ss

Friday, November 30, 2012

உணவே மருந்து ( 38 )


நல்லதை காண வழி!....

நண்பர்களே! 

நாம் உண்ணும் உணவு சரியான உணவா என்று கண்டுபிடிக்க ஒரு எளிய வழி! 

அதாவது குறிப்பிட்ட நேரத்தில் நாம் உண்ணும் உணவைத் தனித் தனியாக வகைப்படுத்திக் கொள்ள வேண்டும்.

அதில் எந்த ஒருபகுதியையும் தனியாக பசியாற உண்ணலாம் தவறில்லை என்றால் அது சரியான உணவு! 

குறிப்பிட்ட ஒன்றைத் தனியாகப் பசியாற உண்ண முடியாது அல்லது அப்படி உண்டால் தீங்கு விளையும் என்றால் அது தவறான உணவு என்று பொருள்! 

ஆகையால் தனியாக பசியாற உண்டாலும் தீங்கில்லை என்னும் உணவு வகைகளை மட்டுமே மற்ற உணவுவகைகளுடனும் சேர்த்து உண்ணலாம்.

அப்படி அல்லாதவற்றை உண்ணாமல் தவிர்ப்பதே உடல் நலனுக்கு ஏற்றதாகும்! 

Thursday, November 22, 2012

அரசியல் ( 24 )


நாடு உருப்படுமா?

நாட்டுமக்களுக்கு என்ன வகையில் எல்லாம் பயன்படும் என்ற அக்கரை உணர்வு அரசுத் திட்டங்களுக்கு அடிப்படைக் காரணமாக இருந்தால் அந்த நாட்டு மக்கள் நலம் பெறுவர்!

ஆனால் ஆள்வோரின் பைகளுக்கு எந்த அளவு போய் சேரும் என்பதே அரசுத் திட்டங்களின் அடிப்படைக் காரணமாக இருக்கும் ஒரு நாட்டுமக்கள் எப்படி நலம் பெற முடியும்?

அந்தநாடுதான் எப்படி உருப்படும்?

Tuesday, November 6, 2012

விவசாயம் ( 38 )



நாட்டு மாடுகள்!

இப்போதெல்லாம் இயற்கை வேளாண்மையைப் பற்றி அதிகம் பேசப்படுகிறது! 

அதன்மூலம் நஞ்சில்லா உணவு மக்களுக்குக் கிடைக்கவேண்டிய அவசியம் பற்றியும் வலியுறுத்தப்படுகிறது!

அதற்கு சீமை மாடுகள் பயன்படாதாகையால் நாட்டுமாடுகளின் அவசியமும் அறிவுறுத்தப்படுகிறது. 

ஆனால் நாட்டுமாடுகளின் பயன்பாடு குறைந்து அழியக்கூடிய நிலையை நெருங்கிக்கொண்டுள்ளது. 

இன்னும் தப்பிப் பிழைத்திருக்கும் நாட்டுமாடுகளைத்தான் காப்பாற்றி மேலும் பெருக்கவேண்டும்!

நாட்டுமாடுகள் காப்பாற்றப்படவேண்டுமானால் நாட்டுமாடுகளை விவசாயப் பணிகளிலும் உள்ளூர்ப் போக்குவரத்துகளிலும் பயன்படுத்தவேண்டும்! 

அப்படிப்பயன்படுத்தவேண்டுமானால் அந்த மாடுகளிடம் வேலை வாங்கக்கூடிய விவசாய வேலையாட்கள் போதுமான அளவு இருக்கவேண்டும்.

போதுமான அளவு வேலையாட்கள் இதை நம்பிப் பிழைக்க வேண்டுமானால் அவர்களுக்கு நல்ல ஊதியம் வழங்கப்படவேண்டும்! 

வேலையாட்களுக்கு நல்ல ஊதியம் வழங்கவேண்டுமானால் விவசாயிகளுக்கு நல்ல வருவாய் கிடைக்கவேண்டும்.

விவசாயிகளுக்கு நல்ல வருவாய் கிடைக்கவேண்டுமானால் விளை பொருட்களுக்கு நல்ல விலை கிடைக்கவேண்டும். 


விவசாய விளைபொருட்களுக்கு நல்ல விலை கொடுக்கவேண்டுமெனில் நாட்டின் ஒட்டுமொத்த செலவினங்களில் தனிநபர் செலவினங்களில் கூடுதல் சதவிகிதம் விளைபொருட்களுக்கானதாக இருக்கவேண்டும்!

அரசுகளின் திட்டங்கள் அதற்கேற்ப திட்டமிடப்படவேண்டும்!

இத்தனை பிரச்சினைகளையும் சமாளித்து நமது பாரம்பரிய விவசாயத்தையும் நாட்டு மாடுகளையும் காக்கவேண்டிய அவசியம் யாருக்குத் தேவை? 

அவனவனுக்குக் கொள்ளையடிக்கவும் கொள்ளையடித்த சொத்துக்களைப் பதுக்கவும் பாதுகாக்கவுமே நேரம் போதவில்லை! இதற்கெல்லாம் நேரமெங்கே?

கிடக்கிறதெல்லாம் கிடக்கட்டும் கிழவியைத் தூக்கி மணையில் வை அப்படின்னானாம்!......

நாட்டுமாடுகளாவது இன்னொண்ணாவது!.....


 வரலாற்றுச் சக்கரத்தைப் பின்னோக்கிச் சுழற்றமுடியாது!

ஆனால் செய்த தவறுகளில் இருந்து படிப்பினைகளைக் கற்றுக்கொண்டு சரியான பாதைக்குத் திரும்ப முடியும்!

ஆனால் போகாத ஊருக்கு வழிதேடுவதே நமது மக்களின் எண்ண ஓட்டங்களாக உள்ளது!

அது ஆட்சியாளர்களுக்கு ஏற்புடையதாய் உள்ளது!

ஒருகாலத்தில் வாழ்ந்தால் போதும் என்ற அளவுக்குத்தான் தொழிலாளர்களுக்கு ஊதியம் கொடுக்கப்பட்டது.

அதனால் கிடைத்த மலிவான உழைப்பின்மேல்தான் விவசாயம் நிலைகொண்டிருந்தது!

தொழிலாளர்களின் வறுமைதான் விவசாயிகளின் வாழ்வுக்கு அடிப்படையாக இருந்தது.

ஆனால் காலம் மாறிவிட்டது.  இப்போது அவ்வளவு மலிவாக தொழிலாளர்கள் கிடைக்கமாட்டார்கள்.

ஆனால் அப்படிக் கிடைத்தால்தான் வாழமுடியும் அல்லது செய்ய முடியும் என்ற நிலையில் விவசாயத் தொழிலை இன்னும் வைத்திருந்தால் அது பாழ்பட்டுப்போகாமல் என்ன செய்யும்?

அதுதான் இப்போது நடக்கிறது!

இதற்கு விவசாயிகள் சிலரின் மாறுபட்ட முயற்சிகளோ தனிநபர்களின் தனித் திறமைகள் எல்லாம் தீர்வாகுமா?

அரசுகளின் திட்டமிடல் அன்றி , அரசுகளின் ஆதரவு இன்றி அரசாங்கத்தை நம்பி இருந்தால் பயனில்லை என்று நினைத்துச் செய்யப்படும் முயற்சிகள் எல்லாம் பயன்தராது!

என்றைக்கும் ஒன்றை உணரவேண்டும். ஒரு அரசானது நல்ல நோக்கங்களுக்கு இசைவாக இல்லை என்றால் நிச்சயம் அது எதிராக நிற்கிறது என்று பொருள்!

அதனால் அரசுகளை நிர்பந்திக்கப் போராடுவது என்பது இரு விதங்களில் பயன் கொடுக்கும்.

முதலாவது மக்கள் விரோத நிலையை கடைப்பிடிக்காமல் தடுப்பது. இரண்டாவது நல்ல திட்டங்களைச் செயல்படுத்த நிர்பந்திப்பது!

இதை மறந்து அரசுகளை அல்லாமல் விவசாயிகளோ அல்லது ஒட்டுமொத்த மக்களோ தீர்வை எதிர்பார்த்தால் அது தும்பைவிட்டு வாலைப் பிடிப்பதாகும்!



Friday, November 2, 2012

அரசியல் ( 23 )


கடமையும் கத்தரிக்காயும் 

தேர்தலில் நிற்கும்  மக்களால் கண்டுகொள்ளப்படாத சிலரைத் தவிர 

எல்லோரும் லஞ்சம் கொடுக்கிறார்கள்.

எல்லோரும் பொய் சொல்லுகிறார்கள் .

எல்லோரும் ஏமாற்றுகிறார்கள் .

எல்லோரும் வேண்டுமளவு கள்ளச்சாராயமும் நல்ல சாராயமும் வாங்கிக் கொடுக்கிறார்கள்!

எல்லோரும் அனுமதிக்கப்பட்ட அளவுக்கும் பலமடங்கு அதிகமாக செலவு செய்கிறார்கள். 

தாம் வெற்றிபெற்றால் பலவழிகளிலும் மக்களை வஞ்சனை இல்லாமல் கொள்ளையடிக்க அனைவருமே ஆர்வத்துடன் இருக்கிறார்கள்!

எல்லோரும் நன்றிமறக்க வெட்கப்படாதவர்களாக இருக்கிறார்கள். 

மற்ற நாடுகள் காரித்துபும் அளவு நமது நாட்டை ஆக்குகிறோமே என்ற அவமான உணர்வு சிறுதும் அற்றவர்களாக இருக்கிறார்கள்! 

அந்நிய வங்கிகளில் கொள்ளையடிக்கும் பணத்தை போட்டுவைப்பதில் போட்டி போடுபவர்களாக இருக்கிறார்கள். 

ஆனால் மக்களோ நல்லவர் யார் கேட்டவர் யார் என்று தெரிய முயற்சிகூடச்  செய்யதவர்களாக இருக்கிறார்கள்! 

இந்த நிலையில் இப்படிப்பட்ட பேர்வழிகளுக்கு ஒட்டுப்போடுவதுதான் ஜனநாயகக் கடமை என்றும் ஓட்டுப்போட மறுப்பது குற்றமென்றும் சில அறிவாளிகள் சொல்கிறார்கள்! 

நல்லவர்களுக்கு ஒட்டுப்போடவேண்டும் என்றும் சொல்கிறார்கள்!

ஆனால் யார் நல்லவர்கள், யாருக்கு ஒட்டுப்போடவேண்டும் என்று மட்டும் சொல்வதில்லை! 

அப்படியானால் யாருக்கு ஓட்டுப்போடுவது?

இதுதான் புனிதக் கடமையும் கத்தரிக்காயுமா?

Thursday, November 1, 2012

உணவே மருந்து ( 37 )


தண்டனை

அறிந்தோ அறியாமலோ கண்டதைத் தின்று உடல் எடையை அதிகரித்துக் கொண்டால் விரும்பியோ விரும்பாமலோ கஷ்டப்பட்டுத்தான் எடையைக் குறைக்கவேண்டும்! 

தேவையின்றி வாய்க்கு ருசிக்காக உண்ட கடனை பசித்துன்பத்தைத் தாங்கித்தான் தீர்க்கவேண்டும்!

இதில் என்ன ஒரு கொடுமை என்றால் சாதாரண காலங்களில் பசியும் ருசியும் இருப்பதைப்போல் எடையைக் குறைக்க முயற்சிக்கும் காலங்களில் பலமடங்கு அதிகமான பசியும் ருசியும் இருக்கும். 

தேவையின்றித் தின்றதர்கான தண்டனையை பசியையும் ருசியையும் மறந்துதான் அனுபவிக்கவேண்டும்! 

தப்பிக்க வேறு வழி இல்லை!