ss

Thursday, October 31, 2013

தத்துவம் ( 19 )

விதியும் மதியும் 

விதியை மதியால் வெல்ல முடியுமா?

இந்தக் கேள்வி அடிக்கடி எழுப்பப்படுகிறது.

ஒரு சாரார் முடியும் என்பதும் மற்றவர்கள் முடியாது என்பதும் காலம் காலமாக சொல்லப்பட்டு வரும் வாதமாகும்.

ஆனால் இன்றளவும் ஒரு பொது முடிவுக்கு வரவே இல்லை! 

அனைவரும் ஒரே உலகில் ஏறக்குறைய ஒரேவிதமான அடிப்படை வாய்ப்புகளைக் கொண்டுதான் வாழ்ந்து வருகிறோம்.

ஆனால் இந்த விஷயத்தில் ஏன் முரண்படுகிறோம்? 

விதி என்றால் என்ன? 

அறிவியல் விதிகளா? உடற்கூறு இயல் விதிகளா? கணித விதிகளா? இயற்பியல் விதிகளா? வேதியியல் விதிகளா? வானியல் விதிகளா? 

இவைகளும் இன்னும் இவைபோன்றiயும்தான் விதிகள் என்றால் அதை யாரால் மாற்ற முடியும்? நிச்சயம் முடியாது! 

காரணம் இவை மனிதனால் அறியப்பட்ட விதிகள். மனிதனால் உருவாக்கப்பட்டவை அல்ல.

ஆனால் வேறு சில விதிகள் உள்ளன. 

ஆதாவது அவை மனிதன் தனது தனிப்பட்ட வாழ்க்கைக்கும் சமூக வாழ்க்கைக்குமாக தானே உருவாக்கிக்கொண்டவை.

ஆதாவது அரசியல் சட்டங்கள், சமூக  ஒழுங்கைக் காக்க உருவாக்கிக் கொள்ளும் பல்வேறு வகையான விதிகள். சமூக அமைப்புகளும் நிறுவனங்களும் தங்களின் சிறப்பான நடவடிக்கைகளுக்காக உருவாக்கிக்கொள்ளும் விதிகள், விளையாட்டு விதிகள், போக்குவரத்து விதிகள் இன்னும் பல உள்ளன.

இவையெல்லாம் மாற்றக்கூடிய விதிகள். 

காரணம் மனிதன் தனது தேவைக்காக உருவாக்கிக்கொண்டவை!

 அந்தத் தேவைகள் காலாவதியானால் அந்த விதிகளை நீக்கி விட்டு வேறு பொருத்தமான விதிகளை உருவாக்கிக்கொள்ளலாம். 

இந்த இருவகையான விதிகளையும் நாம் அறிவோம். 

அவற்றில் ஒரு வகையை நாம் வெல்ல முடியாதென்பதையும் மறுபகுதியை நினைத்தபோது வெல்லலாம் என்பதையும் நன்றாக அறிவோம்.

ஆனால் பலர் இந்த இரண்டு வகையிலும் சேராத ஒன்றை விதி என்றும் அதை வெல்ல முடியும் என்றும் வெல்ல முடியாது என்றும் பட்டி மன்றம் நடத்திக்கொண்டு இருக்கிறார்கள்.

அது என்ன விதி? 

அந்த விதியின் தோற்றுவாய் என்ன?

அந்த விதியின் தேவை என்ன? அந்த விதி மக்களுக்கு எந்த வகையில் பயன்படுகிறது? 

எந்த ஒழுங்கு முறைக்கும் வாழ்வு முறைக்கும் இணக்கமாக இல்லாத முன் கூட்டி அறிய முடியாத முன்னறிந்து தடுக்க முடியாத நடந்து முடிந்த பின்னால் மட்டும் பேசப்படும் நிகழ்வுகளைத்தான் அத்தகையவர்கள் விதி என்று சொல்கிறார்கள்.

அப்படிச் சொல்லப்படும் விதி என்பதை நம்புபவர்கள் ஒரு அணியாகவும் நம்பாதவர்கள் ஒரு அணியாகவும் பிரிந்து மோதிக்கொள்வதைக் காணலாம்.

அப்படிப்பட்ட விதியை நம்புகின்றவர்களை விதி என்றால் என்ன என்று கேட்டால் அவர்களுக்குத் தெரியாத அனைத்தையும் விதி என்பார்கள். அதை யாராலும் வெல்ல முடியாதென்றும் சொல்வார்கள். 

இன்னதென்று தெரியாத ஒன்றை வெல்வதற்கு அங்கு என்ன இருக்pறது?

இல்லாத பாம்பை அடிப்பதற்கு தடிக்கு என்ன தேவை இருக்கின்றது?

ஆதாவது தோல்வி அடைந்தால் அதை விதி என்பார்கள். வெற்றி பெற்றால் தோல்வியடைந்தவனின் விதி என்பார்கள். 

தீராத நோய் வந்தால் அதை விதி என்பர்கள்.

செத்துப் போனாலும் விதி என்பார்கள். 

விபத்து நடந்தால் விதி என்பர்கள்.

தொழிலில் நட்டம் ஏற்பட்டால் விதி என்பர்கள். 

அவர்களிடம் விதி என்றால் என்ன என்று ஒற்றை வரியில் விளக்கம் கேட்டால் சொல்லவே மாட்டார்கள். 

ஆனால் ஒன்றைமட்டும் நிச்சயம் சொல்லத் தவறமாட்டார்கள். 

ஆதாவது விதியை யாராலும் வெல்லவெ முடியாது என்று!

இவர்கள்தான் இப்படி என்றால் விதி என்ற ஒன்றை மதியால் வெல்லலாம் என்று சொல்பவர்கள் இருக்கிறார்கள. 

இல்லாத ஒன்றை இருப்பதாகச் சொல்வதற்கும் அந்த இல்லாத ஒன்றை மதியால் வெல்லலாம் என்று சொல்வதற்கும் என்ன பெரிய வேறு பாடு இருக்கிறது?

இல்லாத ஒன்றுக்காக வாதப் பிரதிவாதம் செய்யும் இவர்கள் விதி என்ற வார்த்தை எங்கெல்லாம் கையாளப்பட்டிருக்கிறதோ அங்கெல்லாம் சென்று அந்த இலக்கியப் படைப்பாளிகள் சொன்னர்கள். அதனால் விதி வெல்ல முடியாதது என்று சொல்வார்கள்.

ஆனால் தவற்றை யார் சொன்னாலும் அது தவறுதான் என்பதை அவர்கள் உணர்வதே இல்லை!  

ஒரு கோணத்தில் பார்த்தால் அவர்கள் சொல்லும் விதியை மதியால் வெல்லலாம் என்பது உண்மையாகவே தெரியும். 

ஆனால் யாருடைய மதி என்பதுதான் பிரச்சினை!

யார் இன்னதென்று தெரியாத விதி என்ற வார்த்தையைக் கண்டும்  அதன் மூலம் எதையெதையோ கற்பனை செய்துகொண்டும் பயத்துடன் வாழ்கிறார்களோ அவர்கள்தான் அந்த விதியை வெல்லக் கூடியவர்கள்!

ஆதாவது யார் விதியை நம்புகிறார்களோ  யார் விதியை வெல்ல முடியாது என்று அடித்துச் சொல்கிறார்களோ அவர்கள்தான்  விதியை வெல்லவும் வேண்டும். 

அப்படி முடியாது என்று சொன்ன ஒன்றை முடியும் என்று அவர்களே நடத்திக் காட்ட அவர்களுக்குப் பயன்படும் உபாயம்தான் மதி என்கிற அறிவாற்றலாகும்.

இன்னதென்று சொல்ல முடியாத ஒன்றை இன்னதென்று புரியாத ஒன்றை அவர்கள் நம்பியதற்குக் காரணம் அவர்களின் அறிவாற்றலுக்கு வேலை கொடுக்காததே ஆகும். 

அப்படிக் கொடுத்திருந்தால் தாங்கள் பயப்படுகின்ற அனைத்தையும் தங்களுக்குத் தெரியாத அனைத்தையும் வருகின்ற துன்பங்கள் அனைத்தையும் தங்களால் விதி என்று சொல்லிப் பயந்து பயந்து செத்ததோடு அந்த விதியை வெல்லவும் முடியாது என்ற சொல்ல மாட்டார்கள்.

ஆகையால் விதியை நம்பும் அவர்கள்தான் மதியைக்கொண்டு அதை வெல்லவும் முடியும்!

ஆம்! அவர்கள் சொல்லும் விதி என்கின்ற பொய்யிலிருந்து அவர்கள் மட்டுமே வெற்றிகரமாக வெளியில் வர முடியும்! 

மற்றவர்களுக்கு அந்தப் பணி இல்லை! 

இல்லாத ஒன்றாகத் தாங்கள் நினைக்கும் ஒன்றை வெல்ல அங்கு என்ன இருக்கிறது?  

Wednesday, October 30, 2013

உணவே மருந்து ( 70 )

தேங்காய் இயற்கையும் செயற்கையும்.....

தேங்காய்ப் பயன்பாட்டுக்கும் அதன் எண்ணைப் பயன்பாட்டுக்கும் உள்ள வேறுபாடுகளை அறிய வேண்டும்! 

தேங்காய் நல்லது என்றவுடன் பலர் தேங்காய் எண்ணையையும் தேங்காயைச் சமையலில் சேர்ப்பதையும் மிகவும் நல்லதாக தவறான கண்ணோட்டத்தில்  
நினைக்கிறார்கள்.

தேங்காயைப் பல்வேறு முறைகளில் சமைக்காமல் இயற்கையாக உண்பதே நல்லது. 

அதைச் சமையலில் சேர்க்கும்போதும் எண்ணையாக மாற்றி அதைச் சமையலில் சேர்க்கும்போதும் அதன் இயற்கைக் கட்டமைப்பும் மருத்துவப் பண்புகளும் பாதிக்கப்படுவதில் துவங்கி, தீங்கு விளைவிப்பது வரை பல விதமாக மாறுபட்ட விளைவுகளை உண்டுபண்ணுகிறது!...

அதனால் தேங்காயையும் தேங்காய் எண்ணையையும்கூட இயற்கையாகப் பயன்படுத்துவதே சிறந்தது!

Wednesday, October 16, 2013

விவசாயம் ( 67 )

எந்த நிலையிலும் இழப்பு வேண்டாம்!......

நண்பர்களே! 

எந்த ஒரு விலை நிலவரத்திலும் விவசாயத்தில் இழப்பு ஏற்படாமல் இருக்க வேண்டுமானால் அதற்கு ஒரே ஒரு முன் நிபந்தனை இருக்கிறது! 

அதுதான் அதிகபட்ச விளைச்சலை உறுதிப் படுத்துவது! 

அதிக பட்ச விளைச்சல் எடுக்கும்போது விளைச்சலின் தரம் அதிகமாக இருக்கும்.

விலையும் அந்த நேரத்தின்  அதிகபட்சமாக இருக்கும். 

ஆனால் அதற்கு மாறாக விளைச்சல் குறைவாக எடுக்கும்போது விளைச்சலின் தரமும் குறைந்து விடுகிறது! 

அதன் தொடர்ச்சியாக விலையும் அந்தநேரத்தின் குறைந்த பட்ச விலையாகத்தான் இருக்கும். 

உதாரணமாக சின்ன வெங்காயத்தை எடுத்துக்கொள்வோம்.....


ஒரு ஏக்கரில் எட்டு டன் விளைச்சல் இருந்தால் அன்றைய அதிகபட்ச விலையாக பத்து ரூபாய் கிலோவுக்கு என்று வைத்துக் கொண்டால்கூட எண்பதாயிரம் ரூபாய் வரவு கிடைக்கும். 

அதில் ஐம்பதாயிரம் ரூபாய் முட்டுவளி செலவு போனாலும்  மீதி நிகர வருவாயாக முப்பதாயிரம் ரூபாய் கிடைக்கும்! 

அதே சமயம் விளைச்சல் ஐந்து டன்னாக இருந்தால் அப்போதைய நிலையில் ஏழு ரூபாய்க்குத்தான் ஒரு கிலோ விற்கும்! 

ஐந்து டன்னுக்கு மொத்தம் முப்பத்தி ஐந்தாயிரம்தான் கைக்கு வரும்! 

அதனால் முட்டுவளிக்கே போதாமல் பதினைந்தாயிரம் ரூபாய் இழப்பு ஏற்ப்படும்....

அது தவிரக் குடும்ப செலவுகளும் சேர்ந்து பெரிய இழப்பாக மாறும்!.....

இந்த நிலைதான் ஒவ்வொரு பயிர் சாகுபடியிலும் ஏற்படும். 

அதனால் சந்தை விலை எப்படி இருந்தாலும் இழப்பு ஏற்படக் கூடாது என்றால் விளைச்சலை முதல் தரத்திலும் அதிகபட்ச அளவிலும் எடுக்க வேண்டும்!......

அதுவே விவசாய வெற்றிக்குக் குறைந்த பட்ச உத்திரவாதமாக இருக்கும்! 

உணவே மருந்து ( 69 )

இயற்கை உணவே இணையற்ற உணவு!....

ஒரு தானியத்தை அப்படியே நிலத்தில் இட்டு தண்ணீர் விட்டால் அது முளைக்கிறது. 

அதே தானியத்தை வேக வைத்தோ வறுத்தோ நெருப்பில் சூடு படுத்தியோ அதன்பின் விதைத்தால்  முளைப்பதில்லை! 

அதன் வடிவம் மாறாமல் இருந்தாலும் வெப்பத்தால் குணம் மாறுவதால் முளைக்கும் தன்மையை இழந்து விடுகிறது!

அதே போலத்தான் சமைக்காமல் உண்ணக்கூடிய உணவு வகைகளை சமைத்து உண்ணும்போது அவற்றின் குணம் மாறுவதால் பயனும் குறைந்து போகிறது! 

அது தவிர எதிர்மறையான பண்பும் தோன்றுகிறது! 

மருத்துவப் பண்புகளையும் இழக்கிறது! 

அதனால்தான் இயற்கை உணவே இணையற்ற உணவு என்று மதிக்கப்படுகிறது!....


Tuesday, October 15, 2013

அரசியல் ( 54 )

விமோசனம்....

நமது நாட்டின் அவலங்களுக்கெல்லாம் முக்கியக் காரணம் அஹிம்சை என்ற பித்தலாட்டத்தைச் சொல்லி வீரம் காயடிக்கப்பட்டதே!....

அதனால் நல்லவர்கள்கூட சாராம்சத்தில் கோழைகளாக வாழ்கிறார்கள்!

கோழைகளாக வாழும் நல்லவர்கள் தாங்கள் வீரர்களாகவும் இருக்கவேண்டும் என்ற உணர்வுடன் ஒன்று சேர்ந்தால் நாட்டுக்கு விமோசனம் நிச்சயம்!

(மேலே உள்ள செய்தியை நான் முகநூலில் பதிந்ததற்கு பல விமர்சனங்கள் வந்தன. அவற்றுக்கு நான் அளித்த பதில்களில் இருந்து....) 

நண்பர்களே! சில லட்சம் மக்கள் தொகை உடைய பல நாடுகள் விடுதலை பெற்றதெல்லாம் இந்த ஏமாற்றுப் பேர்வழிகளின் அஹிம்சையை வைத்தா?....இத்தனை கோடி மக்கள் வாழும் நாடு வீரத்தைச் சார்ந்திராமல் விடுதலை பெற்றோம் என்று சொல்வது அவமானம் அல்லவா?....

கடந்த ஆறுமாதங்களாக நமது நண்பர்கள் பலர் சேர்ந்து ஒரு கூட்டுப்பண்ணை அமைக்கத் திட்டமிட்டோம்....

அதற்கான விதிகளை வகுத்து நாட்டுக்கே முன்னுதாரணமான இயற்கை வேளாண பண்ணையாக அமைக்கத் திட்டம் வகுக்கப்பட்டது. 

மதுரையில் ஒரு கூட்டம்கூட நடத்தினோம்....

ஆனால் வெட்கக் கேடான விஷயம் என்னவென்றால் கூட்டுறவே நாட்டுயர்வு என்றும் நாட்டுக்குப் பொருத்தம் நாமே நடத்தும் கூட்டுப் பண்ணையம் விவசாயம் என்றும் பித்தலாட்டம் பேசுபவர்களின் சட்டதிட்டங்களின்படி அப்படி ஒரு அமைப்பை நாம் விரும்பும் முறையில் அமைக்க வழியே இல்லை என்பதுதான்! 

அப்படியானால் நமது அரசுகள் மக்கள் ஒன்று படுவதை தடுக்கிறது என்பதுதானே பொருள்? இது என்ன நியாயம்?....

அஹிம்சை என்ற மூட்டையில் மக்களைக் கட்டிப்போட்டுவிட்டு அதன் தொடர்ச்சியாக அனைத்து செயல்களும் நாட்டில் மக்களுக்கு எதிராகத்தான் நடக்கின்றன? நாட்டில் நேரடியாகவோ மறைமுகமாகவோ சட்டபூர்வமாக வாழும் ஒரே ஒரு மனிதரை நாம் காண முடியுமா? இதுதான் நமக்கு அஹிம்சை வழி தந்த பரிசா?......

மக்களின் வாழ்க்கை மேம்பாட்டுக்கு இந்த அஹிம்சை எந்த முறையில் வழி காட்டியது? அஹிம்சையைச் செயல் பட அனுமதிக்க முடியாத அளவு தீய சக்திகள் எப்படி வளர்ந்தன?.....அவற்றை அதிகாரத்தில் இருப்பவர்கள் அஹிம்சையை போதித்து ஏன் கட்டுப்படுத்தவில்லை? அஹிம்சை என்னதான் நமக்குக் கொடுத்தது? இனி கொடுக்கப் போகிறது? எந்த அரசு மக்களின்மேல் அஹிம்சை முறையில் ஆட்சி செய்கிறது?....இந்த அஹிம்சையால் அனைத்து ஆலயங்களிலும் அனைத்து மக்களும் சமமாக வழிபட உதவ முடியுமா?.....

வீரம் என்பது நியாயத்தின் பக்கம் உறுதியாய் நிற்பது நண்பர்களே! அது அஹிம்சையின் வழி நின்று நடந்திருந்தால் நாம் வாழ்த்த மாட்டோமா?.....

அஹிம்சை எந்தக் காலத்திலும் ஒரு போராட்டமுறையாக இருக்கவில்லை! அப்படிச் சொல்லப்பட்டது! யாராலும் பின்பற்றப்படவில்லை. அதனால் அப்படி நம்புவதில் பொருள் இல்லை. நமது பொறுப்புக்களை உணர்ந்து கடமாயாற்றவேண்டும் அவ்வளவே!....

.அஹிம்சை தவறு அல்ல! அது நம் ஒவ்வொருவரிடத்திலும் இருக்கவேண்டிய பண்பு! அந்தப் பண்பு நம்மிடம் இருப்பதால்தான் சமூகத்தில் மக்கள் படும் ஹிம்சையை எதிர்த்துப் பொருமுகிறோம்!ஆனால் அது மக்களை ஏமாற்றும் முகமூடியாகப் பயன்படுத்தப்பட்டதும் படுவதும்தான் சோகம்!

அஹிம்சையை எங்கு பயன்படுத்தவேண்டும் ஆயுதத்தை எங்கு பயன்படுத்தவேண்டும் என்பதற்கு வரைமுறை இருக்கிறது நண்பர்களே! சே ஆயுதத்தைப் பயன்படுத்தினார் என்றால் பொழுதுபோக்குக்காக அல்ல! விடுதலைக்காக!....அந்த வீரம் இன்றும் உலகில் எண்ணற்ற இளைஞர்களுக்கு வீரத்துக்கு விளக்கம் சொல்லிக்கொண்டு உள்ளது!.

போராட்ட உணர்வும் போராடும் மக்களும் இருக்கிறார்கள் நண்பரே! ஆனால் அவர்களை ஒழுங்குபடுத்தி வழிநடத்தும் சக்திமிக்க நேர்மையான வழிகாட்டும் அமைப்பு இல்லை!

 நியாயத்துக்காகக் குரல்கொடுக்கும் நாம் நம்மைநாமே இழிவுபடுத்திக்கொள்ளவேண்டிய அவசியம் இல்லை!......நாம் வஞ்சகர்கள் அல்ல!

ஒரு சே உலகின் கண்களுக்குத் தெரியும் வண்ணம் உயரத்தில் இருக்கிறார்! கோடிக்கணக்கான சே க்கள் அமைதியாகச் செயல்பட்டுக்கொண்டு இருக்கிறார்கள். தனிநபர் துதியில் நம்பிக்கை வைக்க வேண்டியது இல்லை. காரணம் அது முகமறியாத் தியாகிகளுக்கு இழைக்கப்படும் அநீதி ஆகும்!....

நான் பெரும்பாலும் தனி நபர்கள் அவர்கள் எவ்வளவு பெரிய வரலாற்று நாயகர்களாக இருந்தாலும் அவர்களின் பெயர் சொல்லிப் பாராட்டுவதையோ குறைசொல்வதையோ செய்வது இல்லை. காரணம் விமர்சனத்துக்கு அப்பாற்பட்டவர்கள் யாரும் இல்லை! அதனால் அவர்களின் சிறப்புக்களையும் குறைகளையும் அவர்களின் கோட்பாட்டை ஒட்டித்தான் செய்வேன். அந்த வகையில் காந்தியின் பாத்திரத்தை மதிக்கும் என்னால் அவருடைய மாபெரும் வல்லமை வீணடிக்கப்பட்டதை ஏற்றுக்கொள்ள முடிவதில்லை!.....

அஹிம்சை என்பதும் வீரம் என்பதும் சரியான பொருளில் புரிந்துகொள்ளப்பட்டால் குழப்பம் இருக்காது! 

அஹிம்சை என்பது ஒவ்வொருவரும் மற்ற மனிதர்களிடமும் பிற உயிரினங்களிடமும் நடந்துகொள்ளவேண்டிய உயர் பண்பாகும்! 

அனால் அது ஒரு போராட்ட முறையாக முன்வைப்பதுதான் பிரச்சினை! 

அதன் விளைவாக அஹிம்சை பாதிக்கப்பட்ட மக்களைவிட பாதகர்களுக்கே அதிகம் பயன்பட்டது. 

இப்போதும் பயன்பட்டுக்கொண்டு இருக்கிறது! 

மக்களை நிராயுதபாணிகளாக ஆக்குவதைத் தவிர அது ஒன்றும் சராசரி மக்களுக்கு உதவுவது இல்லை! 

ஆனால் வீரம் என்பது அப்படியல்ல! 

அஹிம்சை என்பதும் வீரம் என்பதும் சரியான பொருளில் புரிந்துகொள்ளப்பட்டால் குழப்பம் இருக்காது! 

அஹிம்சை என்பது ஒவ்வொருவரும் மற்ற மனிதர்களிடமும் பிற உயிரினங்களிடமும் நடந்துகொள்ளவேண்டிய உயர் பண்பாகும்! 

அனால் அது ஒரு போராட்ட முறையாக முன்வைப்பதுதான் பிரச்சினை! 

அதன் விளைவாக அஹிம்சை பாதிக்கப்பட்ட மக்களைவிட பாதகர்களுக்கே அதிகம் பயன்பட்டது. 

இப்போதும் பயன்பட்டுக்கொண்டு இருக்கிறது! 

மக்களை நிராயுதபாணிகளாக ஆக்குவதைத் தவிர அது ஒன்றும் சராசரி மக்களுக்கு உதவுவது இல்லை! 

அஹிம்சைக்கு வக்காலத்து வாங்குவோர் அப்படிச் சொல்லி மக்களை ஏமாற்றியதைவிட சாதித்த சாதனைகளை விளக்கினால் பயனுள்ளதாக இருக்கும். 

அஹிம்சை வழியில் சுதந்திரம் பெற்றோம் என்கிற பச்சைப் பொய்யையே திரும்பத் திரும்பச் சொல்வதைவிட வேறொன்றையும் சொல்லத் தெரியாது! 

காந்தியைத் தவிர அஹிம்சையைப் பின்பற்றியவர்கள் எத்தனைபேர் என்று தேடித்தான் அறிய வேண்டும். 

ஆனால் வீரம் என்பது அப்படியல்ல! 

அஹிம்சைப் பண்புகளுக்கு எதிரான , மக்களிளின் அமைதியான வாழ்வுக்குப் பயன்படாத எதையும் துணிவுடன் எதிர்ப்பதே வீரம் ஆகும். 

காலித்தனமும் அடாவடித் தனமும் மோசடியும் வீரம் ஆகாது! 

நியாயத்துக்காகப் போராடுவதே வீரம்....

அத்தகைய வீரத்தை வளர்ப்பதற்குப் பதிலாக போலி அகிம்சையை மக்களுக்கு உபதேசிப்பதும் ஏமாற்றுவதும் அவர்களுக்கு எதிராக ஆயுதங்களைத் தயார்நிலையில் வைத்திருப்பதும்தான் அஹிம்சை வழி என்றால் அந்த வஞ்சக வழியை ஒழித்துக்கட்டுவதைவிட முக்கியமான பணி எதுவும் இருக்க முடியாது!

 இந்தியாவின் இன்றைய தேவை, ஒரு நல்ல சர்வாதிகாரி என்பது பலருடைய கருத்து! இது சரியான கருத்து அல்ல ! தனியொரு மனிதன் அப்படியொரு நல்லவனாக எந்தப் பின்பலமும் இல்லாமல் இருக்கமுடியாது!...அப்படியொருவன் தவறி உருவானால் அவனது உடல் சல்லடைக் கண்களாகத் துளைக்கப்படும் என்பதை அறியவும்....

சாதி, மத, மொழி, இன வேறுபாடுகளுக்கு அப்பால் அனைவரையும் பாதிக்கக்கூடிய தீமைகளை எதிர்த்து அனைவரும் சகோதரத்துவ உணர்வுடன் போராடவேண்டும்!.....கப்பல் மூழ்கிக்கொண்டிருக்கும்போது அதில் இருந்து ஒற்றுமையாகத் தப்பிப்பதற்குப் பதிலாக தங்களுக்குள் சச்சரவு செய்து மடிவது நியாயம்தானா?

மீண்டும் அழுத்தமாகவே சொல்கிறேன்:
அவர் ஒரு நல்ல சர்வாதிகாரி என்று பிரபாகரனைப் பற்றி ஒரு நண்பர் சொன்னார்! அதற்குச் சொன்ன பதில்:

அப்படிச் சொல்ல உங்களுக்கு முழுச் சுதந்திரம் இருக்கிறது!....ஆனால் என்னால் அப்படிச் சொல்ல முடியாது! காரணம் நான் அவர்கள்மேல் வைத்துள்ள மதிப்பும் மரியாதையும் மிகவும் உயர்ந்தது!...அதனால் அவர்களைப் பற்றி அவர்களே நினைக்காத ஒன்றைச் சொல்வது அவர்களை நிந்திப்பதற்குச் சமமாகும் என்பதே!

சர்வாதிகாரிகளில் நல்லவர் கெட்டவர் என்ற பாகுபாடு அரசு முறைகளில் கிடையாது! 

இன்றும் இந்தியாவில் நல்ல சர்வாதிஎன்று பலரால் அறியாமையின்காரணமாகப் பாராட்டப்படும் ஒருவர் அடுத்து நடத்திய தேர்தலில் ஏழு மாகாணங்களில் ஒரு தொகுதியில்கூட வெற்றி பெற முடியாமல் துடைத்தெறியப்பட்டார்! 

இந்தோனீசியாவிலும், பிலிப்பைன்சிலும், எகிப்திலும் இன்னும் பல நாடுகளிலும் நல்ல சர்வாதிகளின் நிலைமை என்னவாயிற்று என்பதும் தெரிந்ததே! 

அத்தகைய கழிசடைகளில் ஒருவராக ஒரு மாவீரனைச் சித்தரிப்பது அவருக்கு அவமானம்!

அதுதான் ஒரு நாட்டுக்குத் தேவை என்பது முற்றிலும் தவறான ஒன்று! 

தான் யாருக்காகப் போராடினாரோ அந்த மக்கள் அனைவர் நெஞ்சிலும் குடியிருக்கும் ஒரு தியாகியை சர்வாதிகாரி என்று சொல்வது சரியா என்று அந்த அமைப்பின் முன்னோடிகளைக் கேட்டுப் பாருங்கள் சரியான விடை சொல்வார்கள்!....

சர்வாதிகாரி என்ற சொல்லே ஜனநாயகத்துக்கு எதிரானது. அதில் நல்லது கெட்டது என்ற பாகுபாடு எடுபடாது!.....

ஒரு தந்தைக்கும் பிள்ளைகளுக்கும் உள்ள உறவை எப்படி ஒரு சர்வாதிகாரிக்கும் மக்களுக்கும் உள்ள உறவாக உங்களால் ஒப்பிட முடிந்தது? 

மாவீரர்களை சர்வாதிகாரிகளாகச் சித்த்ரிப்பதன்மூலம் அவர்கள்மேல் என் போன்ற எண்ணற்றவர்கள் கொண்டுள்ள உயர் மரியாதையிலும் நல்லெண்ணத்திலும் நஞ்சைக் கலக்காதீர்கள்! 

நல்லாதாக நினைத்துத் தவறான பொருளில் சித்தரிக்கிரீர்கள்!.....

 ஒரு தந்தை தன் பிள்ளைகளை எந்தக் காலத்திலும் விஷவாயு அறைகளில் அடைத்துக் கொல்ல மாட்டான். 

ஆனால் சர்வாதிகாரிகள் செய்வார்கள்...ஈழத்தில் நடந்த படுகொலைகள்கூட ஒரு சர்வாதிகாரி மேற்கொள்ளக்கூடிய பாசிஸ்ட் நடவடிக்கை என்று சொல்லாமல் ஜனநாயக நடவடிக்கை என்று சொல்வீர்களா? 

மாவீரர்கள் சர்வாதிகாரிகள் என்றால் பாசிஸ்டுகள்தான் மாவீரர்களாக இருப்பார்கள்! 

பிரபாகரன் சர்வாதிகாரி என்றால் ராஜபட்சே சர்வாதிகாரத்துக்கு எதிராகப் போராடிய போராளியா?....

.என்ன பார்வை இது?



Friday, October 11, 2013

தத்துவம் ( 18 )

தியானம்

அலைபாயும் மனதை ஒரு நிலையில் நிறுத்துவதே தியானம்.....

அமைதியான சூழலில் வசதியாக அமர்ந்துகொண்டு கண்களை மூடிக்கொண்டு முதலில் மனத் திரையில் ஓடும் சம்பந்தமில்லாத எண்ணங்களையெல்லாம் கவனிக்கவேண்டும். 

அதன்பின் அவற்றை ஒதுக்கித் தள்ளிக்கொண்டே வரவேண்டும். 

அதன்பின்னும் ஒரு எண்ணம்கூட தொடர்ந்து ஒரு வினாடிகூட மனதில் நில்லாமல் ஒதுக்கித் தள்ளி ஒரு தீப ஒளி அல்லது ஒரு புள்ளி இதில் ஒன்றை மனதில் எண்ணிக்கொண்டு அதை ஊடுருவி எண்ணத்தைச் செலுத்தவேண்டும். 

அப்போது ஒரு ஹம்மிங் ஒலி நமது மூளையில் இசைத்துக்கொண்டிருப்பது கேட்கும். 

அதைக் கவனிக்கத் துவங்கினால் மற்ற எண்ணங்கள் மறைந்து அந்த நாதத்தின் வலிமை அதிகரித்துக்கொண்டே போகும்! 

அதை ஓங்கார நாதம் என்றும் சொல்வார்கள்! 

அதன்பின் அதைத் தவிர வேறெந்த எண்ணமும் இருக்காது! 

அந்த நாதத்தில் நாம் முழுமையாகக் கரைந்து போவோம். 

இன்பதுன்பம், விருப்பு வெறுப்பு போன்ற எந்த உணர்வுகளுக்கும் அங்கு இடமில்லை! 

இந்தப் பிரபஞ்சப் பெருவெள்ளத்தில் ஒரு துளியாக நம்மை உணர்வோம். 

அந்த நாதத்தில் ஒரு துளி நம்மிடமும் ஒலிப்பதை அதில் நம் மனம் லயிப்பதை உணரலாம்.

இந்த அண்ட சராசரமும் மாபெரும் இயக்கமும் ஆன்மிக மொழியில் சொன்னால் ஆதிப் பரம்பொருளும் நாமும் வேறு வேறு அல்ல ஒன்றுதான் என்பதை உணர்வோம். 

ஸ்தூல வடிவங்கள் மறைத்து அங்கு நாதம் மட்டுமே நிலவும்! 

அப்படி உணர்வதே உண்மையான தியானம்! 

அப்படிப்பட்ட அனுபவம் ஏற்படாத தியானம் தியானமே அல்ல!

இந்த தியானம் என்பது ஏதோ ஒரு மதம் அல்லது வழிபாடு அல்லது ஆன்மிகம் சம்பந்தப்பட்டதாக அதிகம் பேசப்படுகிறது! 

உண்மை அது அல்ல! 

தியானம் ஆன்மிகம் சம்பந்தப்பட்டது என்றால் ஆன்மிகத்தை மறுக்கும் இறை மறுப்பாளர்களுக்கும் தியானத்துக்கும் சம்பந்தம் இல்லையா?

நிச்சயம் உண்டு என்பதே விடை! 

தியானம் என்பது மனிதராய்ப் பிறந்த ஒவ்வொருவருக்கும் அவசியமானதும் தொடர்புடையதும் ஆகும். 

காரணம் மனிதன் மட்டுமே வேறுபட்ட பாதையில் பரிணாமவளர்ச்சி அடைந்தவன்!

மனிதன்மட்டுமே சிந்திக்கவும் அதைத் தொடர்ந்து பலவிதமான மனப் போராட்டங்களில் சிக்கித் தவிப்பவன்! 

மனிதன் மட்டுமே பல்வேறு விதமான நல்லதும் கெட்டதுமான பண்புகளை வளர்த்துக்கொண்டு ஒருவரை ஒருவர் முட்டி மோதி நிம்மதி அற்ற வாழ்வு வாழ்ந்துகொண்டு இருக்கிறான். 

மனிதனுக்கு மட்டுமே மனதைப் பக்குவப் படுத்தி அமைதியான வாழ்வுக்கு உறுதுணையாக மாற்றவேண்டிய அவசியம் இருக்கிறது.

மனிதமனம் மட்டுமே பல்வேறு அழுக்குகளால் நிறைந்திருக்கிறது! 

அவற்றைக் கழுவிச் சுத்தப்படுத்தவேண்டிய அவசியமும் மனிதனாகப் பிறந்த அனைவருக்கும் உள்ளது! 

அதற்கான அற்புத உபாயம்தான் தியானம்! 

தியானம் ஒரு உன்னதமான மனப் பயிற்சி! 

அதைச் செய்வதன்மூலம் மனதைத் தாழ்ந்த நிலையில் இருந்து உயர்ந்த நிலைக்கு இட்டுச் செல்கிறோம். 

தியான நேரத்தில் உயர்ந்த எண்ணங்கள் எழுவதால் வாழ்வில் கடைப்பிடித்த பல தவறான பண்புகள் உணரப்படுகிறது! 

இயற்கைக்கும் மனித வாழ்வுக்கும் உள்ள உண்மையான இணைப்பை அறிவுபூர்வமாக உணர்த்துகிறது!....

எண்ணத்துக்கும் சொல்லுக்கும் செயலுக்கும் உள்ள முரண்பாடுகளை உணர்ந்து எது சரி என்பதை உணர தியானம் கற்பிக்கிறது!.....

இத்தகைய உன்னதக் கோட்பாடான தியானத்தை மூட நம்பிக்கை என்ற குடுக்கைக்குள் அடைத்து வியாபாரம் செய்கிறார்கள்! 

அப்படி மூட நம்பிக்கைகளை அடிப்படையாகக் கொண்டு  பேசப்படும் அனைத்தும்  வெற்றுப் பேச்சுக்களே!

அத்தகைய தவறான பொருட்களில் புரிந்துகொள்ளாமல் சரியான பொருளில் உணர்ந்து பின்பற்றினால் தியானம் என்பது உயர்ந்த ஒரு வாழ்க்கைப் பண்பு ஆகும்!.....

Wednesday, October 9, 2013

உணவே மருந்து ( 68 )

காலத்தின் கட்டாயம் 

இயற்கை உணவுக் கோட்பாடு பபற்றிக் கணக்கின்றிக் கட்டுரைகள் எழுதியிருக்கிறேன் என்பது நிறைய நண்பர்கள் அறிவார்கள். 

அவற்றையெல்லாம் இங்கு கொண்டுவந்து குவிப்பது கடினம். 

முந்தைய பதிவுகளைப் பாருங்கள்! 

இனியும் தனிப் பதிவுகளாகவும் கட்டுரைகளாகவும்  அவ்வப்போது பார்ப்போம்! 

 மனித இனம் மட்டுமல்ல அனைத்து உயிரினங்களும் இயற்கையான உணவுகளை அடிப்படையாகக் கொண்டே தோன்றி வளர்ந்து வாழ்ந்து கோடிக்கணக்கான ஆண்டுகள் பூமியில் நிறைந்திருக்கின்றன என்பதை முதலில் அனைவரும் கணக்கில்கொள்ள வேண்டும்.  

மனிதன்மட்டுமே பரிணாம வளர்ச்சியின் விளைவாகப் பிற உயிரினங்களை விட்டு தனிப்பாதையில் பிரிந்து வேறுபட்ட முறையில் வளர்ந்தான்.

அப்படிப்பட்ட ஒரு காலகட்டத்தில் நெருப்பின் பயனையும் அதில் சுடப்படும் உணவுகள் சுவை கூடுதலாக இருப்பதையும் உண்பதற்கு எளிமையாக இருப்பதையும் அறிகிறான்.

அதன்பின்புதான் கடந்த காலங்களில் அது பலவிதமான மாறுதல்களுக்கு உட்பட்டு இன்று பாஸ்ட் பூட் காலத்தில் போய்க்கொண்டு இருக்கிறது. 

இத்தனை மாறுதல்களுக்கும் உணவு உட்பட்டதற்குக் காரணம் சுவையும் எளிமைப் படுத்தலுமே! 

ஆனால் அதற்கு விலையாக உண்ணும் உணவு சிதைக்கப்பட்டு வேதிப்பண்புகள் ஏற்றப்பட்டு குறைந்த அளவில் இருந்து மிக அதிகமான அளவு வரை உடல்நலனுக்கு எதிராக மாற்றப்பட்டு பல இன்னல்களுக்கும் நோய்களுக்கும் ஆளாகி வருகிறோம். 

இன்று நம்மிடையே உள்ள நோய்கள் பெரும்பாலானவற்றுக்கு நமது உணவு முறையின் கோளாறும் உடல் உழைப்பு இன்மையும் உடற்பயிற்சி இன்மையுமே காரணங்கள் ஆகும். 

முன்னர் இருந்ததைவிட சராசரி ஆயுள் அதிகரிப்புக்குக் காரணம் மருத்துவ அறிவியல் வளர்ந்ததும் பட்டினி குறைந்ததும் உணவு நிறையக் கிடைத்ததும் ஆகும்! 

அதே சமயம் பெரும்பாலோர் நோயாளிகளாகவும் மருத்துவத்தையும் மருந்துகளையும் சார்ந்து வாழ்பவர்களாகவும் இருக்கிறோம் என்பதையும் கணக்கில் கொள்ளவேண்டும்! 

இந்த அவலத்தைப் போக்க வேண்டுமென்றால் நமது வாழ்வும் உணவுமுறைகளும் இயற்கைக்கு நெருக்கமானதாக மாறவேண்டும் என்பது தவிர்க்க முடியாத தேவை ஆகும்!

இயற்கை உணவுக் கோட்பாட்டை உள்ளபடியே அனைவரும் உணரவேண்டுவது காலத்தின் கட்டாயம். 

அதற்கு யாரும் விதிவிலக்கு அல்ல!.....