ss

Wednesday, July 30, 2014

எனது மொழி (169 )

சரியான வாழ்க்கை! 

நாம் நினைப்பதுபோலவே உலகில் அனைவரும் நினைத்தால், 

நாம் பேசுவதுபோலவே உலகில் அனைவரும் பேசினால், 

நமது செயல்களைப் போலவே உலகில் உள்ள அனைவரது செயல்களும் இருந்தால்........

உலகமும் வாழ்க்கையும்  மிக அற்புதமான ஒன்றாக இருக்கும் என்று நமது மனச் சாட்சிக்குப் பட்டால்.......

நாம் சரியாக வாழ்கிறோம் என்று பொருள்!.....

Saturday, July 26, 2014

உணவே மருந்து ( 87 )

உண்ணும் முன்னே.....

நண்பர்களே! 

நல்ல உடல்நலத்துடன் இருப்பவர்கள் தான் உண்ண நினைத்திருக்கும் உணவு சுத்தமானதா, அதை உண்ணவேண்டிய தேவையுடன் நாம் இருக்கிறோமா, அந்த உணவு தீங்கு விளைவிக்காத நல்லுணவா சுவையான உணவா என்று மட்டும் யோசித்து உண்டால் போதுமானது!

நோயாளிகளாக இருந்தால் அந்த உணவு தான் இருக்கும் நிலைக்குப் பொருத்தமானதும் அவசியமானதும்தானா என்று யோசித்து உண்டால் போதும் 

ஆனால் பலருடைய உணவு சம்பந்தமான ஆலோசனைகள் உணவுப் பொருள்சத்துக்கள் பற்றிய ஆராய்ச்சி மாணவர்களுக்கானது போல் உள்ளது!

அப்படி  உணவுப் பண்டங்களில் அடங்கியுள்ள அனைத்து சத்துக்களையும் நினைவில் கொண்டு பார்த்துப் பார்த்து உண்ண நினைப்பது தேவையற்றது. 

அது ஒருவிதத்தில் உடல் நலனுக்குத் தீங்கானதும்  ஆகும்.

Tuesday, July 22, 2014

எனது மொழி ( 168 )

உயிரின் விலை....

உருவத்தில் பெரிய உயிரினம் ஒன்று இறந்தால் வருத்தப் படுகிறோம்.

உருவத்தில் சின்ன உயிரினங்கள் இறந்தால் பெரிதாக வருத்தப் படுவது இல்லை.

அப்படியானால் நாம் உயிருக்குக் கொடுக்கும் விலை என்பது உருவத்தையும் நம்மோடு இருக்கும் உறவையும் அவற்றின் பயனையும் பொறுத்தது தானே?....

உயிர்க்கொலை என்பதை அந்தக் கண்ணோட்டத்தில்தானே பார்க்கிறோம்?....

அது சரியா?....
===================================================================

ஜீவகாருண்யம் 

முந்தின நாள்  பசுமாட்டுக்குப் பொட்டுவைத்துக் கும்பிடுகிறான்.

மறுநாள் காலை வியாபாரி வந்தவுடன் அந்த மாட்டை அடிமாட்டுக்காக (வெட்டுவதற்காக) விலைக்கு விற்கிறான்.

வாங்கிப்போகும் வியாபாரி அதை வெட்டுபவனுக்கு விற்கிறான்.

அந்தக் கசாப்புக் கடைக்காரன் வெட்டிக் கூறுபோட்டு விற்கிறான்.

நிறையப்பேர் அதை வாங்கிப்போய் சமைத்துச் சாப்பிடுகிறார்கள்.

அனைத்து மக்களும் இந்த நான்கு வகைகளில் அடக்கம்!

இந்த நிலையில் இவர்களே ஜீவா காருண்யம் பற்றியும் கொல்லாமை பற்றியும் பேசுகிறார்கள்....

இது என்ன நியாயம்?....இதில் எங்கு கோளாறு?...

==============================================================

Wednesday, July 16, 2014

பங்கு வர்த்தகம் ( 4 )

பங்கு வர்த்தகம் பற்றி சில கருத்துக்கள்....

நண்பர்களே!

நாட்டு நடப்பையும் உலக நடப்பையும் நிறுவனங்களின் நிலையையும் சரியாகக் கணித்துச் செயல்பட்டால் பங்கு வர்த்தகத்தில் வெற்றி பெறலாம், அப்படிச் செய்யாததால் நிறையப்பேர் ஏராளமாக இழக்கிறார்கள் என்று தினமும் தொலைக் காட்சிகளிலும் மற்ற ஊடகங்களிலும் சொல்கிறார்கள்.

நான் கேட்பது என்னவென்றால் பங்கு வர்த்தகம் செய்யும் எல்லோருமே மிகச் சிறந்த நிபுணர் ஒருவரின் வழிகாட்டுதல்படி செயல்பட்டால் அனைவரும் லாபம் ஈட்ட முடியுமா ?

ஒரு வருடத்தில் மிக அதிகமாகப் பங்கு வர்த்தகம் செய்து மிக அதிகமாக சம்பாதித்த ஒருவர் என்ன செய்தாரோ அதையே அனைவரும் செய்தால் அனைவரும் அதே அளவு லாபம் ஈட்ட முடியுமா?...

எனது இந்தக் கேள்வியை அடுத்து பல நண்பர்களுடன் நடந்த எனது உரையாடலில் நான் சொன்னவை.....

ஆதாவது சிலர் ஆதாயம் அடைய வேண்டுமானால் பலர் நட்டம் அடைந்தே தீரவேண்டும் என்பது சொல்லப்படாத நிபந்தனை. அப்படியிருக்க அனைவரும் லாபம் ஈட்ட எப்படி முடியும்? அதனால் அதில் எவ்வளவு கற்றறிந்திருந்தாலும் அனுபவம் பெற்றிருந்தாலும் அந்தத் திறனைப் பயன்படுத்தி லாபம் ஈட்ட முயற்சி செய்யலாம். ஈட்டவும் செய்யலாம். ஆனால் பங்கு வர்த்தகத்தில் இழப்பவர்களின் எண்ணிக்கையைக் குறைக்க முடியாது! காரணம் வெற்றிபெற்றவர்களின் லாபத்துக்கு அதுதான் அடிப்படை!....

ஒருதடவை நான் சன் நியூஸ் தொலைக் காட்சியில் ஒரு கேள்வி கேட்டேன். அந்த நிபுணர் சொன்ன பதிலுக்கும் நான் கெட்ட கேள்விக்கும் சம்பந்தமே இல்லை.

நான் கெட்ட கேள்வி:

குறைந்த விலையில் வாங்கியவர்கள் மார்கெட் உச்சத்தில் இருக்கும்போது ப்ராபிட் புக் செய்துவிட்டு வெளியில் வந்து விடவேண்டும், விலை வீழ்ச்சி அடைந்துள்ள நேரத்தில் வாங்கவேண்டும் என்கிறீர்களே உச்சத்தில் இருக்கும்போது வாங்குவதற்கும் வீழ்ந்திருக்கும்போது விற்பதற்கும் எப்படி ஆட்கள் கிடைக்கிறார்கள் ? வாங்கி விற்பவர்களும் அல்லது விற்று வாங்குபவர்களும் இந்த சூசைட் பாயிண்டை எப்படி விரும்புகிறார்கள்?

அவர் என்னென்னவோ டெக்னிகல்களைச் சொன்னாரே தவிர நேரடியாக பதில் சொல்ல வில்லை.

இனியொரு கேள்வியும் கேட்டேன்.....

நீங்கள் சொன்னபடி அனைவரும் கேட்டால் அனைவருக்கும் லாபம் கிடைக்குமா என்று....

அப்படி எல்லோரும் கேட்கமாட்டார்கள் என்றுதான் பதில் வந்தது!

ஒருக்கால் கேட்பதாக இருந்தால் நிச்சயம் அனைவருக்கும் இழப்புத்தானே ஏற்ப்படும்?...

ஆக ஒழுங்கற்ற இந்த வரவு செலவில் சரியாக திட்டமிட்டு செயல்படுபவன் காசு பார்க்கலாம். மற்றவர்கள் பற்றிக் கவலைப் படக் கூடாது என்பதே இதற்குப் பதிலாக இருக்க முடியும்!

பங்கு வர்த்தகத்தில் நிபுணர்கள் சொல்வது எல்லாமே பெரும்பாலோர் அதுபற்றி அறியாதவர்களாக இருக்கிறார்கள் என்ற நிலைமையை ஒட்டித்தான் ஆகும். அனைவரும் அவர்கள் சொல்லும்படி நடக்கமாட்டார்கள் என்பதை அறிந்தே எதோ அனைவரும் லாபம் பார்க்கும் யோசனைகளைத் தாங்கள் சொல்வதுபோலவும் அதைக் கேட்காததால்தான் நட்டப் படுகிறார்கள் என்பதுபோலவும் சொல்லத் தயக்கம் காட்டுவதே இல்லை!


பங்குச் சந்தை பற்றிய பலருடைய கண்ணோட்டம் பலவாக உள்ளது.

எனக்கு அது சம்பந்தமில்லாத தொழிலாக இருப்பதால் அதை எப்படிக் கையாள்வது என்ற கவலை இல்லை.

ஆனால் அதுபற்றிய என்னுடைய ஆழமான பொருளாதாரக் கண்ணோட்டத்தை மாற்றிக்கொள்ள போதுமான ஆதாரங்கள் இதுவரை கிடைக்கவில்லை.

தொழில் துவங்குவோர் தங்களின் பற்றாக்குறை மூலதனத்துகாக பங்குகள் வெளியிடுவதும் அதை வாங்குவதும் அதற்காகக் கம்பெனிகள் லாபத்தில் டிவிடெண்ட் வழங்குவதும் அந்த டிவிடெண்ட்அதிகமாக இருக்கும் கம்பெனிகளின் பங்குகள் கூடுதல் விலைக்கு விற்பதும் புரிந்துகொள்ளக் கூடியதும் நியாயமானதும் ஆகும்.

ஆனால் அப்படிக் கம்பெனிகளின் பொருள் உற்பத்திக்கும் லாபத்துக்கும் டிவிடெண்ட்டுக்கும் சம்பந்தம் இல்லாமல் நடக்கும் எதுவும் மக்களுக்கோ நாட்டுக்கோ நல்லது அல்ல!

இதுமட்டும் மறுக்க முடியாத உண்மை!...

காரணம் அது தனி மனிதரின் பண வெறியைக் குறிக்கிறதே தவிர அதன்மூலம் எந்தப் பொருள் உற்பத்தியும் நடப்பது இல்லை!

சம்பந்தப் பட்ட நிறுவனங்களின் உயர்வு தாழ்வுக்கோ கமாடிட்டியாக இருந்தால் பொருட்களின் உண்மையான விலை உயர்வு அல்லது தாழ்வுக்கோ சம்பந்தம் இல்லை!....

எந்த ஒரு தொழிலாக இருந்தாலும் அதை நடத்துபவரின் திறமைக்கும் வாய்ப்புகளுக்கும் ஏற்ப வருவாயில் குறைவு அல்லது கூடுதல் அதுதான் தொழில் .

சில மோசமான கால கட்டங்களில் சிறு இழப்புகளும் வரலாம்.

எந்தத் தொழிலாக இருந்தாலும் செய்யும் ஒரு தொழிலில் சிலர் தான் வருவாய் பார்க்கமுடியும் , பலர் நட்டம் அடைவதைத் தவிர்க்க முடியாது, அந்தத் தொழிலால் மக்களுக்கு எந்த நன்மையையும் இல்லை என்றால் அது தொழில் அல்ல!

சூதாட்டமே!.....

பங்குச் சந்தை அப்படி அல்ல! யாரும் இழப்பைச் சந்திக்கவேண்டிய அவசியம் இல்லை, மக்களுக்கு மிகவும் நன்மை பயக்கக் கூடியது என்று இருந்தால் மனதாரப் பாராட்டுகிறேன்.

நண்பரே! ஒன்றுக்கு விளக்கமளியுங்கள்! பங்கு வர்த்தகத்தில் இழந்தவர்கள் ஒரு வருடத்தில் எவ்வளவு இழக்கிறார்களோ அவ்வளவு பணமும் லாபம் அடைந்தவர்களுக்குப் போகிறதா?
நீங்கள் சொன்ன முறைப்படி பின்பற்றி வர்த்தகம் செய்பவர்கள் அனைவருக்கும் லாபம் உத்திரவாதமாகக் கிடைக்குமா?
ஒரு வழிகாட்டுதல் நிபுணரால் சொல்லப் படுகிறது. அதன்படி அனைவரும் நடந்தால் அனைவருக்கும் லாபம் கிடைக்குமென்றால் இழப்பது யார்?

நான் கேட்டதற்கு நீங்கள்  சரியான பதில் அளிக்கவில்லை நண்பரே! ! நீங்கள் பங்குவர்த்தகத்தைச் சரியாகச் செய்து லாபம் ஈட்டுவது பற்றிய நுணுக்கங்களைச் சொல்கிறீர்கள். ஆனால் நான் கேட்பது ஒட்டு மொத்தமான பங்குவர்த்தகத்துக்கும் அதில் முதலீடும் வர்த்தகமும் செய்பவர்களுக்கும் உள்ள உறவுகளும் பொதுவான வழிகாட்டுதல் பற்றியும்!

ஆதாவது சிலர் ஆதாயம் அடைய வேண்டுமானால் பலர் நட்டம் அடைந்தே தீரவேண்டும் என்பது சொல்லப்படாத நிபந்தனை. அப்படியிருக்க அனைவரும் லாபம் ஈட்ட எப்படி முடியும்? அதனால் எவ்வளவு கற்றறிந்திருந்தாலும் அந்தத் திறனைப் பயன்படுத்தி லாபம் ஈட்ட முயற்சி செய்யலாம். ஈட்டவும் செய்யலாம். ஆனால் பங்கு வர்த்தகத்தில் இழப்பவர்களின் எண்ணிக்கையைக் குறைக்க முடியாது! காரணம் வெற்றிபெற்றவர்களின் லாபத்துக்கு அதுதான் அடிப்படை!....

ஒரு திறமையான அனலிஸ்டுடன் ஒப்பந்தம் செய்துகொண்டு வரும் வருவாயில் ஒரு பகுதியை அவருக்குக் கொடுக்கலாம் அல்லவா?...ஆனால் அவரால் நட்டம் வராது என்பதற்கு என்ன உத்திர வாதம்?....உத்திரவாதம்(செக்யூரிட்டி) கொடுப்பாரா?
நீங்கள் சொல்வதுபோல் அனலிஸ்டுகள் சொல்படி நடந்தால் நஷ்டம் சராசரி இருபது சதம் என்று எடுத்துக்கொண்டாலும் பெரும்பாலும் லாபம்தானே? ஏன் அதுபோல் செய்யக்கூடாது?...

ஆக எந்த வகையிலும் லாபம் என்பது உத்திரவாதம் அல்ல என்று ஆகிறது. நஷ்டம் மட்டும் உத்திரவாதமாக இருக்கும் ஒரு தொழிலை எப்படித் தொழில் என்று சொல்வது? அதனால் அதற்குச் சூதாட்டம் என்ற பெயர் வந்தது!..

ஆதாவது , கப்பலே தவறான திசையில் செல்லும்போது அதில் பயணம் செய்பவர்கள் கப்பலுக்குள் கிடைக்கும் வசதிகளை நினைத்து மகிழ்ச்சி அடைய முடியாது. பங்கு வர்த்தகத்தில் கிடைக்கும் லாப நட்டம் அத்தகையதே!

எப்படி இருந்தாலும் துவக்க காலப் பங்கு வெளியீடுகள் தவிர அதன்பின்பு நடக்கிற வர்த்தகத்துக்கும் உற்பத்திக்கும் சம்பந்தம் இல்லை! மாயமான் வேட்டைதான்!....

பொருள் உற்பத்தி செய்யாமல் உற்பத்தி செய்யப்பட்ட பொருட்களின்மேல் எந்த மதிப்புக் கூட்டலும் செய்யாமல் நிம்மதியற்ற மன நிலையுடன் பணத்தைப் பெருக்க நடக்கும் போராட்டமான பங்கு வர்த்தகத்தின் ஆழம் தெரியாமல் காலை விட்டு அனைத்தையும் இழந்தவர்கள் அநேகம்பேர்!

இதில் பணம்பார்த்துப் பழகி விட்டால் மாதம் ஒரு லட்சம் சம்பளம் கூடப் பெரிதாகத் தோணாது! F and O வில் ஒரு வாய்ப்பில் பல வருட வருமானத்தைப் பார்த்து விடலாம் என்ற எண்ணமே வரும்!...உழைத்து வாழும் எண்ணத்தை ஒழித்துக் கட்டும் சிறந்த வழி!.....

இதில் ஈடுபட்டுப் பொய்யாகப் பணம் அடைந்தவர்களைப் பார்த்து எண்ணற்றவர்கள் செய்வது அதிவேகப் பாய்ச்சல்! பல்லு முப்பத்திரண்டும் கழன்றாலும் வேகம் குறைவது இல்லை.....

முடிவு துயரம்தான்!

Monday, July 14, 2014

சிறுகதைகள் ( 18 )

சுவர்க்கம்......

அந்த அம்மாவின் துணைக்கு யாரும் இல்லையா? போக்குவரத்து நிறைந்த அந்தப்பாதையில் தன்னந்தனியாக தட்டுத் தடுமாறி எங்கே செல்கிறார்?


பிள்ளைகள் இருவர். பணக்காரர்களாக இல்லாவிட்டாலும் ஓரளவு வசதியாகவே வாழ்ந்து வருகிறார்கள்.


அப்புறம் ஏன் தன்னந்தனியாக துணையின்றி வெளியில் போகவேண்டும்?


இரண்டு மகன்களையும் நல்லபடி வளர்த்து அவர்களுக்குச் செய்யவேண்டிய அனைத்துக் கடமைகளையும் செய்தாயிற்று. சொத்துக்களையும்; கொடுத்தாயிற்று. தனக்கும் தனது கணவருக்குமென்று ஒரு குறிப்பிட்ட துகை வங்கியில் இருக்கிறது. அவர்கள் யாருடைய கையையும் எதிர்பார்க்கவேண்டிய அவசியமில்லை.


ஆனால் அது எத்தனை நாளைக்கு! வயோதிகம் விட்டுவைக்குமா? பிறர் துணையின்றி வாழமுடியுமா? பெற்ற பிள்ளைகளுக்குச் சுமையாக வாழவேண்டியதாகிவிட்டது. இருவரையும் ஒரே பிள்ளை வைத்துப் பராமரிக்கமுடியுமா? பிள்ளை ஒருவராய் இருந்தால் முடியும் இருவரால் எப்படி முடியும்?... அவர்களின் கொள்கைப்படி ஆளுக்கு ஒருவராக பிரிக்கப்பட்டு மகன்களுடன் சேர்ந்தாயிற்று! மூத்தவனிடம் தாய். இளையவனிடம் தந்தை!


வயிற்றுப்பாட்டுக்குக் குறையில்லை. வசதிக்கும் குறைவில்லை! ஆனாலும்…. ஏதோ ஒன்று வாட்டுகிறதே!


ஐம்பது வருடகாலம் வாழ்ந்த வாழ்க்கை பிரிவை ஏற்க மறுக்கிறதே! தன் துணையின்றி எப்படி இருக்கிறாரோ என்ற கவலை இருவரையுமே வாட்டுகிறதே! இந்தத் துயரத்தை யாரிடம் சொல்வது? இருவருக்கும் அனைத்து வசதிகளும் இருப்பதாக மற்றவர்கள் பேசிக்கொண்டாலும் அதனுள் புதைந்திருக்கும் நரக வேதனையை எப்படித் தாங்குவது?..


மகன்களுக்குள் ஏற்பட்ட பிரச்சினையால் அதிகப் போக்குவரத்து இல்லை. விசேச காலங்களில் தவிர மற்ற நேரங்களில் இவர்களை அழைத்துச்செல்ல யாருக்கும் அக்கரை இல்லை!....


என்ன ஆனாலும் சரி! இந்த நரகவேதனையில் இருந்து விடுபடவேண்டும். மூன்று மைல்களுக்கு அப்பால் இருக்கும் தனது சொர்க்கத்தை,  தன் துணைவரை அடைந்தே தீரவேண்டும்! ..


சொர்க்கத்தின் தூரம் ஒவ்வொரு அடியாகச் சுருங்கிக்கொண்டே வந்தது!

Friday, July 11, 2014

எனது மொழி ( 167 )

படைப்பும் படைப்புச் சக்தியும்.

எல்லையற்ற அண்டவெளியில் அனைத்தும் துகள்களே! 

அனைத்தும் இயக்கங்களே! 

அதில் கண்காணாத ஒரு துரும்பிலும் துரும்பான இவ்வுலகின் ஒரு அங்கமாக அதனோடு சேர்ந்து ஒரு வகையில் இயங்கும் இயக்க முறைமையே மனிதன்.....

அதில் படைத்தவன் என்றும் படைப்பாளி என்றும் நமக்கு நாமே அனுமானித்துக் கொண்டோம்.

படைப்புச் சக்தியிலும் நாம் இருக்கிறோம் , படைப்பிலும் நாம் இருக்கிறோம் என்பதை யார் உணர்கிறார்களோ அவர்களே உண்மையான ஆன்மிகவாதிகள்!....

Wednesday, July 2, 2014

உணவே மருந்து ( 86 )

உணவில் தானியத்தின் பங்கு!

நண்பர்களே! 

உலகில் உணவு உற்பத்தி என்று கணக்கிடும்போது வருடத்துக்கு இத்தனை கோடி டன்கள் விளைந்தன என்று தானியங்களைத்தான் முதன்மையாகக் குறிப்பிடுகிறார்கள்! 

கோதுமை, நெல், சோளம், பார்லி, சிறுதானியங்கள் , அந்தந்த சூழலுக்கு ஏற்ப விளையும் தானியங்கள்,  இவற்றைத்தான் குறிப்பிடுகிறோம். 

காரணம் அவைதான் நமது உணவில் பெரும்பங்கு வகிக்கின்றன! 

ஆதாவது நாம் உண்ணும் உணவில் பெரும் பகுதியாகத் தானிய உணவுதான் விளங்குகிறது. 

அந்தத் தானிய உணவுகளுக்குப் பக்கத் துணையாகவும் சுவை கூட்டவுமே பருப்பு காய்கறி பழ வகைகள் பயன்படுத்தப் படுகின்றன. 

மனிதன் ஆதியில் நெருப்பின் பயனை அறியாத காலத்தில் பழங்களையும் கிழங்குகளையும் கொட்டைகளையும் மட்டுமேதான் உண்டு வாழ்ந்திருப்பான். அப்போது தானியங்கள் அனைவருக்கும் உணவாகக் கூடிய அளவிலும் இல்லை! அதை சமைக்காமல் உண்ண இயலாததாகவும் இருந்தது. 

அதேபோல அவன் உண்ணக்கூடிய இயற்கை உணவு கிடைக்காதபோது மற்ற வேட்டையாடும் விலங்குகளைப் போல் தானும் வேட்டையாடிப் பச்சை மாமிசத்தை உண்டும் வந்தான். 

ஆனால் காலத்தின் கட்டாயத்தாலும் தோன்றிவளர்ந்த காலங்களில் வாழ்வதற்குப் போதுமான சத்துக்கள் கிடைத்ததாலும் பெரும்பாலான நேரங்களில் பழங்களையும் கிழங்குகளையும் பச்சையாக உண்ணக்கூடிய அனைத்தையும் உண்டே வாழ்ந்தான். காரணம் அவைதான் சுவையாக இருந்தன. 

ஆனால் மனிதன் நெருப்பின் பயனை அறிந்தபின்பு நிலைமை மாறிப் போய்விட்டது. 

நெருப்பினால் சுடப்பட்ட அனைத்தும் சுவை கூடுதலாக இருந்தது. 

அதில் குறிப்பாக மாமிசம் சுவை கூடுதலாக உணரப்பட்டதால் முக்கிய உணவாக மாறுகிறது. 

ஆனால் அதன்பின் சமைத்து உண்ணும் வகையில் தானியங்கள் பயன்பாட்டுக்கு வருகிறது.

திரும்பத் திரும்பப் பயிர்செய்யகூடியதாக இருந்ததாலும் சமைத்து உண்டால் சுவையாக இருந்ததாலும் ஒரே இடத்தில் தங்கி விவசாயம் செய்ய ஏற்றதாக இருந்ததாலும் தானியஉணவுப் பயன்பாடு வளர்ந்து காடு திருத்தி நாடாக்கி வேளாண்மை செய்வதற்கு முக்கியக் காரணமும் ஆயிற்று!

தானிய உணவும் மாமிச உணவும் முன்னுக்கு வந்ததாலும் பழங்களைத் தவிர மற்ற  பச்சையாக உண்ணக்கூடிய காய்கறிகளை விட அவை சுவையாக இருந்ததாலும் நீண்ட நாட்களுக்குச் சேமித்துவைக்க உகந்ததாக தானியங்கள் இருந்ததாலும் தானிய உணவு முதலிடத்தைப் பிடித்து விட்டது! 

ஆனால் கோடிக்கணக்கான வருடங்கள் உண்டு வந்த தானியம் அல்லாத உணவைக் குறைத்துக் கொண்டதாலும் தானிய உணவை அதிகப்படுத்தியதாலும் மனித இனத்தின் உடலியல் வாழ்வில் எந்த விளைவுகளும் ஏற்ப்படவில்லையா?

ஏற்பட்டது என்றே நினைக்கிறேன்.

ஆதாவது தானியம் அல்லாத உணவுகளில் கிடைத்து வந்த சத்துக்களுக்குப் பதிலாக தானிய உணவில் அடங்கியுள்ள சத்துக்களை முதன்மையாகச் சார்ந்து வாழும் நிலை ஏற்ப்படுகிறது. 

இரண்டும் ஒரே மாதிரியான சேர்மானங்களைக் கொண்டவை அல்ல! 

ஆனாலும் இயற்கையான பழங்களையும் காய்கனி கிழங்குகளையும் ஓரளவு உண்டு வந்ததன்காரணமாகவும் தானியங்களும் முழுமையாகக் காய்ந்து உலர்வதற்கு முன்னதாகப் பச்சையாகவும் உண்ணப்பட்டதாலும்  கடினமான உழைப்பை ஆதாரமாகக் கொண்டு வாழவேண்டிய சூழல் இருந்ததாலும் உணவு மாற்றத்தின் விளைவுகள் நீண்ட நெடுங்காலம் கடுமையானதாக உணரப்பட வில்லை!

காலப் போக்கில் உழைப்பு குறைந்துகொண்டே வந்தது.

சமையல் உணவு வகைகளின் உச்சகட்டமாக எண்ணற்ற விதங்களில் உணவுகள் சிதைத்து உண்ணப்பட்டன. 

பழங்களைத் தவிர இயற்கையாக அப்படியே உண்ணும் வழக்கம் கிட்டத்தட்ட நின்றுபோய் விட்டது. 

மொத்த உணவில் பழங்களின் பங்கு இயற்கை உணவுத் தேவையைப் பூர்த்தி செய்யும் அளவில் இல்லை! 

உழைப்பும் குறைந்ததாலும் உழைப்புக் குறைவை சமூக அந்தஸ்தாக நினைக்கும் பண்பாடு வளர்ந்தாலும் அதுகாலமும் தீங்கு விளைவிக்காமல் இருந்த உணவு மாற்றம் தீங்காகத் தலைதூக்க ஆரம்பித்தன.

ஆதாவது தானியம் அல்லாத உணவுகள் குறைந்து தானிய உணவுகள் அதிகரித்ததன் மோசமான விளைவுகள் உணரப்பட்டன. 

ஆதாவது நோய்களுக்குக் காரணங்களாகத் தானிய உணவுகள் முன்னிறுத்தப் பட்டன! 

நோய்களுக்கான பத்தியமாக பல்வேறு சமையல் உணவுகள் தடுக்கப்பட்டன! 

நோய்க் காலங்களில் உண்ணத் தக்க முக்கிய உணவாகப் பழங்களும் காய்கறி வகைகளும் முன்வைக்கப்பட்டன.

காரணம் நமது உடல் தேவைகளுக்குத் தேவையான அத்தனையும் தானிய உணவில் இல்லை என்பதும் அதில் அடங்கியுள்ள பல மிகையான சத்துக்கள் உடலில் அதிகமாகச் சேர்ந்து நோய்களாக மாறுகின்றன என்பதுமே!. 

அப்படியானால் மனிதனின் உணவுப் பழக்கங்கள் தொடர்பான வரலாறு நமக்கு என்ன கற்பிக்கிறது?

ஆதாவது தானியங்களை முக்கிய உணவாகக் கொள்வதும் பழங்கள் காய்கறிகளை தானிய உணவுக்குப் பக்க உணவுகளாகப் பயன்படுத்துவதும் தவறு என்கிற பாடத்தைக் கற்பிக்கிறது! 

ஆதாவது பழங்களையும் காய்கறிகளையும் முக்கிய உணவாகவும் தானிய உணவுகளைப் பக்க உணவுகளாகவும் கொள்வதே சிறந்தது என்ற பாடத்தைக் கற்பிக்கிறது!

அதுமட்டுமல்ல, நீண்ட நெடுங்காலம் இந்தத் தவறான விளைவுகளில் இருந்து நம்மைக் காப்பாற்றிவந்த பழங்கள் அல்லாத இயற்கை  உணவுகள் மறைந்துபோனதால் ஏற்பட்ட தீய விளைவுகள்,  இயற்கை உணவுகள்தான் மனிதனுக்கு ஏற்ற உணவுகள் என்றும் பாடம் கற்பித்து இருக்கிறது!

மாமிச உணவும் தானிய உணவைப்போலவே நமக்கு வேண்டிய சத்துக்களை மிதமிஞ்சிக் கொடுப்பதாலும் சமைப்பதால் நேரும் தீங்குகளை உள்ளடக்கியதாக இருப்பதாலும் இவை இரண்டையும் அல்லாத உணவு வகைகளும் இயற்கை உணவுகளும் குறிப்பாகப் பழங்களே மனிதருக்கு ஏற்ற மிகச் சிறந்த உணவு என்று நிரூபிக்கப் படுகிறது!.....

அதனால் மக்களின் உணவுப் பழக்கங்கள் தானிய உணவுக்கும் அதன் ஒரு பகுதியான பருப்புக்கும் மாமிச உணவுக்கும் மிகக் குறைந்த அளவே முக்கியத்துவம் கொடுக்க வேண்டும்.

அவையல்லாத உணவுகளுக்கு மிக அதிக முக்கியத்துவம் கொடுக்க வேண்டும். 

அதன்காரணமாக வருங்காலத்தில் உலக உணவு உற்பத்தி முறை தானியங்களுக்கு முக்கியத் துவம் கொடுக்காமல் தானியமல்லாத உணவுகளை வழங்கவல்ல செடிகளையும் பயிர்களையும் மரங்களையும் வளர்ப்பதற்கு மிக முக்கியத்துவம் கொடுக்க வேண்டும். 

தானியப் பயிர்களுக்கு செலவிடப் படும் பாசன நீர் அனைத்தையும் பயன்படுத்தி அதைவிட இரு மடங்கு அதிகப் பரப்புள்ள கனிதரும் மரங்களையும் செடிகளையும் பயிரிடலாம். 

அதன்காரணமாக நிலத்தைப் பாழ்படுத்தும் விவசாயத்தை மாற்றியமைத்து மண்ணைப் பசும் சோலைகளாக்குவதுதான் விவசாயம் என்று ஆக வேண்டும். 

அந்தத் திசையில் உணவு முறை மாற்றமும் விவசாய மாற்றமும் நிகழ்ந்தால் உலகில் பசுமையால் நிறைந்து அதன் விளைவால் மழை வளமும் அதிகமாகும் 

சங்கிலி போன்ற தொடர்விளைவு நேர்ந்து அற்புத உலகாகவும் வாழ்க்கையாகவும் இருக்கும்!....

சிந்திக்க வேண்டும்!....