ss

Monday, September 22, 2014

சிறந்த ஆன்மிகம்!

எல்லாமுமாய் இருப்பது பரம்பொருள்! 

அதன் ஒரு சின்னஞ்சிறு அங்கமாக இருப்பவை நாம் உட்பட அனைத்தும்! 

அங்கமாக இருப்பவை சரியாக இயங்கினால் அனைத்தும் சரியாக இயங்கும் ! 

ஆதாவது நாம் சரியான வாழ்வு வாழ்ந்தால் சமூகம் உயர்வதற்கு அது பயன்படும் என்பது பொருள்!

அதனால் அனைத்து மக்களும் சரியான வாழ்வு வாழ்வதற்கு எந்தக் கோட்பாடுகள் உதவுகிறதோ அதுதான் சிறந்த ஆன்மிகம்!

====================================================================

தவறான வழிநடத்தல்.....

இந்த ஆன்மிகம் என்ற கோட்பாட்டை உலகளாவிய ஒரு பொருளுக்கு உட்படுத்தாவிட்டால் அதைவிட மக்களுக்குத் தீங்கானது ஒன்றும் இல்லை! 

அப்படி அனைவரும் ஏற்றுக்கொள்ளும் அனைவருக்கும் பொருந்தும் ஒரு பொதுப் பொருள் உருவானால் அதைவிட நல்ல விஷயம் வேறொன்றும் இல்லை! 

காரணம் ஆன்மிகம் என்ற சொல் உலக மக்களை அளவின்றிக் குழப்பித் தவறாக வழிநடத்துகிறது!....

======================================================================

ஆன்மிகத்தில் ஒரு புதுப்பாதை ( 38 )

எனது ஆன்மிகம்!

என்னைப் பொருத்தவரை மூட நம்பிக்கைகள் அற்ற ஆன்மிகத்தைத்தான் பின்பற்றுகிறேன்! 

அதில் மதங்கள் இல்லை. 

கடவுள் வடிவங்கள் இல்லை. 

சடங்கு சம்பிரதாயங்கள் இல்லை. 

வழிபாட்டுத் தலங்கள் இல்லை! 

மன மாச்சர்யங்கள் இல்லை!

காரணம் இறைவன் வேறு நான்(மனிதன்) வேறு என்று பார்ப்பது இல்லை!  

நாம் காணும் மற்றும் காணவும் உணரவும் முடியாத அத்தனையுமாக இருப்பது பரம்பொருள் அல்லது இறைவன். 

நாம் அதில் ஒரு சிறு அங்கமே! 

அதில் நம்முடைய பாத்திரத்தையும் பிறவற்றின் பாத்திரத்தையும் உணர்ந்து நமது பாத்திரத்தைச் சிறப்பாக்குவதே ஆன்மிகம்! 

அதன்படி பரம்பொருளில் நம்மையும் நம்மில் பரம்பொருளையும் பார்க்கவேண்டும்! 

ஒவ்வொருவரும் அனைவரின் நலனை விரும்ப வேண்டும்! 

அனைவரும் ஒவ்வொருவர் நலனினும் அக்கரை கொள்ள வேண்டும்! 

இந்த உரைகல்லை வைத்துத்தான் நான் ஆன்மிகம் என்பதைக் காண்கிறேன்! 

Friday, September 19, 2014

எனது மொழி ( 176 )

ஒன்றும் தெரியாதவர்கள்! 

ஆன்மிகத்துக்கு எதிரானது என்றால் அது அறிவியல் அல்ல! 

அறிவியலுக்கு எதிரானது என்றால் அது ஆன்மிகமும் அல்ல!

ஆனால் ஆன்மிகத்துக்கு விரோதமாக அறிவியலை நினைத்து  அறிவியலுக்கு விரோதமாக மூட நம்பிக்கைகளை  ஏவி விட்டு உலகையும் மக்களையும் பாடாய்ப் படுத்திக்கொண்டு இருக்கிறார்கள்!

இவர்களுக்கு அறிவியலும் தெரியாது! 

ஆன்மிகமும் தெரியாது! 

ஒரு புண்ணாக்கும் தெரியாது! 

சுயநலத்துக்காக மக்களை ஏமாற்றி உலகைக் குட்டிச் சுவராக்க மட்டும்தான் தெரியும்!

Wednesday, September 17, 2014

தத்துவம் ( 40 )

உயிரும் உடலும் 

நண்பர்களே!

மனித இனம் மட்டுமல்ல எல்லா உயிரினமும் தாவரங்களும்கூட தங்களைப் புதுப்பித்துக் கொண்டே இருக்கின்றன.

புதிது புதிதாகத் தோன்றுவது அரிதான ஒன்றாகவே இருக்கலாம்! !

ஆதாவது இருக்கும் உயிரினத்தோடு தாவரத்தோடு மக்களோடு தொடர்பு இல்லாமல் எந்த ஒன்றும் பிறப்பதில்லை.

பூமி உயிரினங்கள் வாழத் தகுதியுடையதாக மாறிய துவக்க காலத்தில் இயற்கைச் சூழலுக்குத் தக்கபடி எண்ணற்ற உயிரினங்கள் தோன்றின.

ஒவ்வொன்றும் தங்களுக்கே உரிய சிறப்புப் பண்புகளுடன் பல்வேறு விதமாகப் பல்கிப் பெருகி உலகை நிறைத்தன.

அப்படிப் புதிதாகத் தோன்றிய மாதிரியே தொடர்ந்து மாறிவரும் சூழலுக்கு ஏற்ற எண்ணற்ற நுண்ணுயிர் இனங்கள் இப்போதும் தோன்றி நம்மிடையே வாழக்கூடும் என்றே நினைக்கிறேன்.

ஆனால் நாம் இப்போது எடுத்துக்கொண்டிருப்பது உயிரினங்களிலேயே மிகவும் சிறப்பான பாத்திரம் வகிக்கின்ற மனித இனம் பற்றியதாகும்.

அதை முன்மாதிரியாகக் கொண்டு பிறவற்றையும் பார்ப்பது சரியாக இருந்தால் பின்னால் பார்ப்போம்.

மனிதராகிய நாம் ஒவ்வொருவரும் பிறக்கிறோம், வளர்கிறோம், வாழ்கிறோம், மறைகிறோம்.

ஒவ்வொரு மனிதன் இறக்கும்போதும் ஒரு உயிர் பிரிந்து விட்டதாக நினைக்கிறோம்.

ஆதாவது ஒரு மனிதனுடன் தோன்றும் உயிர் அவன் மறையும்போது மறைந்து விடுவதாக நினைக்கிறோம்.

உண்மை அப்படியா?



தோன்றும் ஒரு மனிதன் இறக்கும் வரை எந்த மாறுதலுக்கும் ஆளாகாமல் இறந்தால் அவனுடைய உயிர் முடிவுக்கு வந்துவிட்டதாகப் பொருள்.

ஆனால் அவன் வாழும்போதே ஒரு ஆணும் ஒரு பெண்ணும் சேர்ந்து இன்னொரு உயிரை உருவாக்குகிறார்கள்.

ஆதாவது இரண்டு உயிர்கள் சேர்ந்து மூன்றாவதாக ஒன்றை அல்லது பலவற்றை உருவாக்குகின்றது.

அப்படிச் சொல்வது கூடத் தவறு.

இரண்டு உயிர்களில் இருந்து மேலும் சில கிளைகள் பிரிகின்றன.
ஆதாவது ஏற்கனவே வாழ்ந்துகொண்டிருக்கும் உயிரானது தன்னைப் பலவாகப் பெருக்குகிறது!

ஒவ்வொரு ஆணுக்கும் பெண்ணுக்கும் முன்பு எண்ணற்ற தலைமுறையில் வாழ்ந்து மறைந்த எண்ணற்றவர்களின் உயிர்களின் கலவையாகத்தான் இப்போது நாம் வாழ்ந்துகொண்டிருக்கிறோம்.

வாழும்போதே அடுத்த தலைமுறை தொடர்ந்து விடுகிறது...
ஆதாவது ஒரு தலைமுறைக்கும் அடுத்த தலைமுறைக்குமான இணைப்பு துண்டிக்கப்பட்டு அதன்பின்பு உருவாவது இல்லை!

வாழும்போதே உருவாக்கி விடுகிறது! 

ஒவ்வொரு தலைமுறையும் ஒவ்வொருவரும் அதற்கு முந்தைய எண்ணற்ற தலைமுறைகளின் எண்ணற்ற உயிர்களின் இணைப்பாக இருக்கின்ற நிலையில் ஒவ்வொரு மனிதனின் வாழ்வு முடியும்போதும் அவனுடைய உயிர் போய்விட்டதாகவும் ஒவ்வொருவன் பிறக்கும்போதும் புதிதாய் ஒரு உயிர் பிறந்துள்ள தாகவும் சொல்கிறோம்!

அது சரியானதுதானா?

ஒரே உயிர் தொடர்ந்து கிளை பிரிந்து தலைமுறை தலைமுறையாக வாழ்ந்துகொண்டிருக்கும் நிலையில் தனித் தனி உயிர்களாகப் பார்ப்பது சரியா?

ஒரே உயிரின் தொடர்ச்சியைத்தானே எண்ணற்ற உயிர்களாப் பார்க்கிறோம்?

ஆதாவது ஒரே சங்கிலியின் துண்டிக்கப்படாத கண்ணிகளைப்போல் வாழ்ந்துகொண்டு இருக்கிறோம்.

ஆனால் ஒவ்வொரு கண்ணியையும் தனித்த ஒன்றாக ஆதாவது தனித் தனி உயிராகப் பாவிக்கிறோம்.

ஒரே உயிர்ச் சங்கிலியின் கண்ணிகளாக எண்ணற்ற கிளைகளாகப் பிரிந்து வாழ்ந்துகொண்டு ஒவ்வொரு கண்ணியையும் ஒரு தனி உயிராகப் பார்ப்பது வழக்கில் உள்ளது .

வழக்கில் உள்ள முந்திய தலைமுறை உயிருக்கும் அடுத்த தலைமுறை உயிருக்கும் இணைப்பு எப்போது துண்டிக்கப் படுகிறது?....இல்லையே!

ஆதாவது துவக்கமும் முடிவும் தெரியாத ஒரு உயிர்ச் சங்கிலியின் அடிப்பகுதி மறைந்துகொண்டும் நுனிப்பகுதி தொடர்ந்து பல கிளைகளாக வளர்ந்துகொண்டும் உள்ளது.

தொடர்பு துண்டிக்கப்படுவதே இல்லை .

ஆனால் ஒவ்வொரு மனிதனையும் ஒவ்வொரு தனித்தனி உயிராகவே பாவிக்கிறோம்.

உண்மையில் உயிர்ச் சங்கிலியின் ஒவ்வொரு கண்ணியும் தனித் தனிப் பண்புகளோடு வாழுகின்ற அம்சங்கள்தான் தனித்தனியானவை!

ஆதார உயிர் என்பது எப்போதும் துண்டிக்கப்படுவது இல்லை! மறைவதும் இல்லை!

உயிர்தாங்கி நிற்கும் ஆதாவது உயிர் என்கின்ற வாழும் இயக்கத்தின் உள்ளுக்குள்ளேயே நடக்கும் துணை இயக்கங்கள்தான் ஒவ்வொரு மனிதனின் உயிரும்!

நமது உயிர் அப்பா அம்மா இருவரின் உயிர் கலந்தது.

அவர்கள் இருவரின் உயிரும் அவர்களின் அப்பா அம்மாக்களான நால்வரின் உயிர் கலந்தது!

அவர்களின் உயிரோ அதற்கு முந்தைய தலைமுறையின் எட்டுப்பேரின் உயிர் கலந்தது!

ஆதாவது நம்முடைய உயிர் என்பது நமக்கு முந்தைய எண்ணற்ற வர்களின் உயிர்க் கூட்டு ஆகும்!

அதே போல நம் உயிரும் நமக்கு அடுத்து வரும் எண்ணற்ற தலைமுறையின் எண்ணற்றவர்களின் உயிரில் கலந்து இருக்கும்.

ஆதாவது உயிர் என்பது எண்ணற்ற புள்ளிகளால் ஆன ஒரு பெரும் தொகுப்பாகவும் அப்படிப்பட்ட எண்ணற்ற தொகுப்புகளாக மேலும் மேலும் பிரியக் கூடியதுமான ஒரு பேரியக்கம் ஆகும்.

அதில் ஒவ்வொரு தொகுப்புப் புள்ளியையும் ஒரு தனி உயிராகவும் அந்த உயிர்மையமான உடம்பைத் தனி மனிதராகவும் நினைக்கிறோம்.

நமது தோற்றத்துக்கு சில வருடங்கள் வாழ்ந்து மறையும் மனிதன் தனிமனிதனாகவும் அதன் இயக்கம் தனி உயிராகவும் தெரிகிறது. நாமும் நினைக்கிறோம்.

ஒவ்வொரு மனிதனின் உயிர் எப்படித் தனியான ஒன்று அல்லவோ அதுபோலவே உடம்பும் பிறந்ததில் இருந்து சாகும் வரை மாறாமல் இருக்கும் ஒன்று அல்ல!

ஒவ்வொரு மனிதனின் உடம்பும் ஒரு வினாடி நேரம்கூட நிலைமாறாமல் நீடித்து இருப்பதில்லை.

பிறக்கும்போதே எண்ணற்ற தலைமுறையினரின் உடற்கூறு மரபுகளை உள்ளடக்கியே பிறக்கிறோம்.

அதே போல நமது காலத்துக்குப் பின்னாலும் எண்ணற்ற தலைமுறைகளுக்கு நம்மிலிருந்து மரபு வழியான உடற்கூறுகளை விரிவாக புதிதாகப் பிறப்பிக்கவும் செய்கிறோம்.

ஒவ்வொரு வினாடியும் கோடிக்கணக்கான அணுக்களும் அனுக்களாலான பவேறு மூலக் கூறுகளும் புதிதாக உடம்பில் சேர்ந்தவண்ணம் உள்ளன. 

அதேபோல ஏறக்குறைய வெளியேறவும் செய்கின்றன. 

ஒவ்வொரு வினாடியும் சூழலில் இருந்து தன்னுடன் என்னற்றவற்றைச் சேர்த்துக்கொள்வதும் ஒவ்வொரு வினாடியும் தன்னையும் அந்தச் சூழலில் கரைத்துக் கொள்வதுமான வாழ்வைத்தான் ஒவ்வொரு உடம்பும் கொண்டிருக்கிறது.

தன்னுடன் சேர்த்துக் கொள்ள எடுத்துக்கொள்பவற்றில் ஏற்கனவே உயிருடன் வாழ்ந்த அல்லது வாழ்ந்துகொண்டிருந்த மனிதனின் உடம்பில் இருந்து வெளியேறிய அணுக்களும் மூலக் கூறுகளும் அடங்கும்! 

அதுபோலவே தன்னிடம் இருந்து வெளியேற்றப்படும் எண்ணற்ற அணுக்களும் மூலக் கூறுகளும் மற்ற மனிதர்களின் உடம்பு உட்பட பல பாகங்களில் சூழலில் கலக்கிறது! 

ஆதாவது ஒவ்வொரு வினாடியும் பிற மனிதர்களின் உட்கூறுகள் நம்முடன் கலக்கின்ற அதே நேரம் நம்முடைய உடம்பின் உட்கூறுகள் பிற மனிதர்களின் உடலிலும் கலக்கின்றன. 

இந்த நிலையில் ஒவ்வொரு மனிதருடைய உடலின் அடையாளமும் உறவுகளும்தான் மாறாமல் குறிப்பிட்ட காலம் நீடிக்கிறதே தவிர மனிதனின் உடல் கட்டமைப்பு மற்ற மனிதர்கள் உட்பட அனைத்தின் கலவையாகவே உள்ளது! 

இந்த நிலையில் ஒரு உடம்பும் ஒரு உயிரும் என்பது உண்மையில் நம்மால் உணரக்கூடிய புறத் தோற்றமும் மேலெழுந்தவாரியான உணர்வும்தானே தவிர உண்மை அப்படி அல்ல!...

ஒரு இனத்தின் அனைத்து உயிர்களும் கலந்ததே உயிராகும்.

அனைத்து மனிதர்களும் கலந்ததே உடம்பும் ஆகும். 

மறைவது என்பது மனித உயிர் என்ற பொதுப் பண்பில் இருந்து மறையும் சிறு சிறு புள்ளிகளே!

அழிவது என்பது மனித உடல் தொகுபில் இருந்து குறிப்பிட்ட தலைமுறையைச் சேர்ந்த குறிப்பிட்ட அடையாளமும் பல்வேறு பண்புகளும் அடங்கிய குறிப்பிட்ட மனித வடிவங்களே!.

அதனால் நாம்......

 ஒவ்வொரு வினாடியும் பிறந்துகொண்டே இருக்கிறோம். 

ஒவ்வொரு வினாடியும் இறந்து கொண்டே இருக்கிறோம். 

குறிப்பிட்ட வடிவத்துடன் உருவாவதைப் பிறப்பு என்றும் குறிப்பிட்ட வடிவம் மறைவதை இறப்பு என்றும் சொல்கிறோம். 

இங்கு சொல்லப்பட்ட கருத்துக்கள் மனித இனத்தை முன்வைத்துச் சொல்லப்பட்டாலும் அனைத்து உயிரினங்களுக்கும் தாவரங்களுகும்கூட ஏறக்குறையப் பொருந்தும். 

இப்போது ஒரு கேள்வி எழுகிறது....

ஆதாவது நிலையான ஒரு மனித உடம்பும்  அதில் தனியாக ஒரு உயிரும் இல்லாத நிலையில் .....

தனித் தனியான உடல், தனித்தனியான உயிர் , என்று வழக்கில் உள்ள அம்சங்களின் பொருள் அடியோடு மாறுகிறது!....

இந்தநிலையில் போகாத உயிர் போனபின்னால் அது நிலைகொண்டிருந்த ஆன்மா அழிவது இல்லை என்ற கூற்றுகளின் பொருள் என்ன?

ஒரு பிறப்பே நிலையற்ற வெள்ளமாக ஓடிக்கொண்டிருக்கும் நிலையில் மறுபிறப்பு என்ற நம்பிக்கைக்கு என்ன பொருள்?

பாவபுண்ணியங்கள், சுவர்க்கம், நரகம் ஆகியவை மனித வாழ்வுடன் எப்படிப் பொருந்துகின்றன?

மக்களாகிய நாம் வாழும் வாழ்க்கையின் உண்மையான பொருள் என்ன?

வாழவேண்டிய முறை என்ன?  

தெளிவான பதிலை யார் சொல்லப் போகிறார்கள்!......பார்ப்போம்! 


Monday, September 15, 2014

உணவே மருந்து ( 93 )

பேனும் பெத்த பெருமாளும்.....

நண்பர்களே! 

வழியைப்  பார்த்து நடக்கணும் என்று பெரியவர்கள் சொல்வார்கள்! 

அதன்பொருள் என்ன?

நாம் நடக்கும் பாதையில் கல்லும் முள்ளும் குழியும்  குண்டுகளும் இருக்கிறதா என்று பார்த்து நடக்கணும் என்று பொருள்! 

காரணம் அப்படிப் பார்த்து நடக்காவிட்டால் கால் இடறியும் கல், முள் பட்டும் காயம் ஏற்படலாம்!

ஆனால் அதற்காக வழியைப் பார்த்து நடக்கிறேன் பேர்வழி என்று ஒவ்வொரு அடிக்கும் வழியை உற்றுப் பார்த்துப் பார்த்து அதில்  குப்பை இருக்கிறது, சிறு சிறு கற்கள் இருக்கிறது,, நுண்ணுயிர்கள் இருக்கிறது, அதை மிதித்தால் நோய்த் தொற்று வரும், வேறு தொல்லை வரும்  என்றெல்லாம் ஒரு காலைத் தூக்கி வைத்துக்கொண்டு எங்கே வைப்பது என்று ஆராயந்துகொண்டு இருக்க முடியாது!

சின்னச் சின்ன விஷயங்களையெல்லாம் கால்கள் சமாளிக்கும்! 

சற்றுப் பெரியதையும் பழக்கத்தால் இயல்பாகவே நினைத்துப் பார்க்காமலே சமாளித்து நடப்போம். 

அது போல ......

உண்ணும் உணவைப் பார்த்து உண்பது மிகவும் நல்லதே! 

ஆனால் எதைப் பார்க்கவேண்டும் என்று ஒரு வரைமுறை இருக்கவேண்டும்! 

ஆதாவது உடல் நலத்துக்கு ஏற்றதா? கெடாமல் இருக்கிறதா? சுவையாக இருக்கிறதா? சுத்தமாக இருக்கிறதா? இயற்கைத் தன்மை பாழ்படாமல் இருக்கிறதா? என்பது போன்ற அடிப்படையான சிலவற்றைப் பாத்தால் போதும்!

மற்றதை நமது உடம்பே பார்த்துக்கொள்ளும்! 

நோய் வந்தால் அப்போது ஆராய்ந்து தகுந்த உணவை மாற்றி உண்டால் போதும்! 

 அதைவிட்டுவிட்டு நாம் உண்ணும் ஒவ்வொன்றிலும் என்னென்ன சத்துக்கள் எந்த விகிதத்தில் உள்ளன, எதில் சூடு  அதிகம், எதில் குளிர்ச்சி அதிகம், எதில் வாதம் பித்தம் கபம் அதிகம் உள்ளது , ஒவ்வொன்றிலும் ஒவ்வொரு நேரத்துக்கும் எந்த விகிதத்தில் உண்ணவேண்டும் என்றெல்லாம் கணக்குப் போட்டுச் சிபாரிசு செய்கிறார்கள்! 

இது கிருஷ்ணதேவராயரின் அரண்மனைக்கு வந்த பண்டிதர்கள் சமையல் செய்யப்போய் அனைத்தையும் கெடுத்துப் பட்டினி கிடந்த கதைபோல் இருக்கிறது! 

அதனால் ஈரைப் பேனாக்கிப் பேனைப் பெருமாளாக்கும் பண்டிதர்களின் யோசனைகளைக் கண்டுகொள்ளாமல் உடலும் உணர்வும் அறிவும் அனுபவமும் என்ன சொல்கிறதோ அப்படி அப்படி உண்டு வாழ்வதே சரியான முறை!

பசிஎடுக்குமளவு உழைப்போம்! 

தேவையானதைத் தேவையான அளவு உண்போம்! 

நலமாக வாழ்வோம்! 

அவ்வளவே!...

Tuesday, September 9, 2014

தத்துவம் ( 39 )

                                     ஒரு கேள்வி! 

இந்த மாபெரும் அண்டத்தில் எல்லையற்ற பல மாபெரும் சங்கதிகள் அடங்கியுள்ளன.  

அளவிட முடியாத அண்டம், 

அதில் பேறு வெடிப்பின்மூலம் வெடித்துச் சிதறுவதும் பின் ஒரு காலத்தில் சுருங்கிக் காணாமல் போவதுமான அடி முடி தெரியாத பிரபஞ்சங்கள்,

அதற்குள் தலைதெறிக்க ஓடிக்கொண்டிருக்கும் நிலையிலேயே உருவாவதும் மறைவதுமாக இருக்கும் எண்ணற்ற நட்சத்திரக் கூட்டங்கள்,





நட்சத்திரக் கூட்டங்களில் அடங்கியுள்ள பல்வேறு வகையிலான நட்சத்திரங்கள், கருந்துளைகள், வாழ்வு முடிந்துபோன நட்சத்திரங்கள், செம்பூதங்கள், வெள்ளைக் குள்ளர்கள், பல்சார்கள், நியூட்ரான் விண்மீன்கள், 

வின்மீன்களைச் சுற்றிக்கொண்டிருக்கும் உயிரினங்கள் வாழ்கின்ற மற்றும் வாழாத எண்ணற்ற கோள்கள், துணைக்கோள்கள்,.....

ஆம்!...இதற்குள்ளே கண்காணாத ஒரு  இடத்தில்   நமது சூரிய மண்டலமும் பூமியும்....

அதில் வாழும் கோடானுகோடி உயிரினங்களில் ஒன்றான மனித இனம்....

கேள்வி என்ன வென்றால் எல்லையே இல்லாத இந்த அண்டமும் அதில் உள்ள அத்தனையும் இப்படித்தான் தோன்றியது இங்குதான் தோன்றியது , இன்னார்தான் தோற்றுவித்தார் அல்லது தோற்றுவிக்கப் பட்டது என்று நேற்று முளைத்த மனிதன் அடித்துச் சொல்கிறானே .....

அது எப்படி?  

Monday, September 8, 2014

உணவே மருந்து ( 92 )

எண்ணெய் இரண்டு முகங்கள்......

எண்ணெய் முக்கியமாக இரண்டு விதமாகத் தயாரிக்கிறார்கள் என்று நினைக்கிறேன்.

முதலாவது எண்ணெய் வித்துக்களை செக்கில் இட்டு ஆட்டி எண்ணெயைப் பிழிந்து எடுப்பது.

அதாவது தேங்காய், நிலக்கடலை , எள்ளு போன்றவை.
இரண்டாவதாக எண்ணெய் எடுக்கப் பயன்படும் விளைபொருட்களை நசுக்கி, அதன்பின்பு உயர்வெப்பத்தில் காய்ச்சி எண்ணெயைப் பிரித்து எடுப்பது.

எனக்குத் தெரிய கிராமங்களில்கூட விளக்கெண்ணையை இப்படித்தான் தயாரிக்கிறார்கள். இன்னும் அதுபோல நிறைய இருக்கின்றன.

இப்பொது நாம் எடுத்துக்கொண்ட பொருள் எண்ணெய் எப்படித் தயாரிக்கப் படுகிறது என்பது மட்டும் அல்ல!

அது எப்படிப் பயன்படுகின்றன என்பதே!

செக்கில் ஆட்டி எடுக்கப் படும் ஒரு எண்ணையில் அதை எடுக்கப் பயன்படும் எண்ணெய்வித்தில் உள்ளடங்கியிருக்கும் சத்துக்களில் பெரும்பாகம் அடங்கியிருக்கும்.

மீதம் கழிவாக வெளித் தள்ளப் படும் பிண்ணாக்கில் இருக்கும்.
ஆனால் உயர்வெப்பத்தில் தயாரிக்கப் படும் எண்ணையில் அதன் மூலப் பொருளில் அடங்கியிருந்த சத்துக்களில் ஒரு பாகம் இருந்தாலும் அதன் பண்பு வெப்பத்தின்காரனமாக மாற்றத்துக்கு உள்ளாகி இருக்கும்.

ஆதாவது உயர் வெப்பத்தின் காரணமாக அதன் இயற்கைக் கட்டமைப்பு மாறிப்போய் இருக்கும்.

ஆனால் வெப்பத்தைப் பயன்படுத்தாமல் ஆட்டி மட்டும் எடுக்கப்படும் எண்ணெய்களில் அந்த மாற்றம் ஏற்படாமல் இயற்கைப் பண்புகளுடன் இருக்கும்.

இத்தனையும் எண்ணெய் என்கிற நிலையில் இருக்கும்போது மட்டுமே சொல்ல முடியும்.

ஆனால் எண்ணெய் ஆனபின்னால் அடுத்து நமக்கு உணவாகும்போது எல்லா எண்ணெய்களும் கிட்டத்தட்ட சமம் ஆகி விடுகின்றன.

காரணம் சமையலில் அனைத்து எண்ணெய்களுமே காய்ச்சப் படுவதால் ஆட்டிய செக்கு எண்ணெய்கூட மற்ற எண்ணெய்களுக்குச் சமமாகத் தரம் குறைக்கப் படுகிறது!.

அடுப்பில் வைத்து எப்போது சமைக்கிறோமோ அப்போதே அனைத்துச் சமையல் எண்ணெய்களும் தரத்தில் ஒன்றாகி விடுகின்றன.
அவற்றுக்கும் நமது உடல் ஆரோக்கியத்துக்கும் உள்ள உறவு ஒன்றாகி விடுகிறது.

இனியும் நாம் நினைத்துப் பார்க்காத ஒரு கொடுமையான விஷயம் என்னவென்றால் எண்ணெய் வெப்பத்தால் தான் கெடுவது மட்டுமல்ல அதில் போட்டுச் சமைக்கப் படும் மற்றும் பொறிக்கப் படும் மற்ற உணவுப் பண்டங்களையும் சிதைத்துச் சின்னாபின்னப் படுத்துகின்றது.

குரங்கு தான் கெட்டதும் அல்லாமல் வனத்தையும் கெடுத்த கதையாக எண்ணெய் வெப்பத்தால் தான் கெட்டுப் போவதுமல்லாமல் மற்றவற்றையும் கெடுக்கின்றது.

நாவுக்குச் சுவைதவிர அந்த மாதிரிப் பண்டங்களில் அடங்கியுள்ள சில சத்துக்களைத் தவிர மற்றபடி தீங்கானதாக மாறி விடுகிறது.

எண்ணையில் தயாரிக்கப் படும் உணவுப் பண்டங்களில் உள்ள சத்துக்கள் மருந்து மாத்திரைகளில் அடங்கியுள்ள சத்துக்களுக்கு இணையானவை . அவற்றைவிடச் சிறந்தவை என்று சொல்ல நியாயமான காரணம் இருக்க முடியாது.

அதனால் எண்ணெய் வித்துக்கள் மற்றும் எண்ணெய் ஆகியவற்றின் பயன்பாட்டில் நாம் சில விஷயங்களைக் கணக்கில் கொள்வது மிகவும் நல்லது.

முதலாவது எள்ளு, தேங்காய், நிலக்கடலை போன்ற எண்ணெய் வித்துக்களை இயற்கையாக உண்ணும் வாய்ப்பு உள்ளதால் இயற்கையாக உண்பதே சிறந்தது.

தேங்காய்எண்ணெய் நல்லெண்ணெய் போன்றவற்றை எண்ணையாக ஆட்டிய பின்னாலும் அவற்றை வெப்பப் படுத்தாமல் பிற சமைத்த உணவுகளுடன் கலந்து உண்பது மேலானதாக நினைக்கிறேன்.

அதைவிட்டு இயற்கை முறையில் உண்ணக்கூடியவற்றையும் வெப்பத்தினால் சிதைத்துத்தான் உண்போம் என்பதை விடாப் பிடியாகப் பின்பற்றினால் நல்லதும் தீயதாக மாறி நம்மை வாதிக்கும் என்பதை மறக்கக் கூடாது!.

எண்ணையின் நன்மை விளைவிக்கும் பக்கத்தை மட்டும் நாம் மதிக்க வேண்டும்.

தீங்கு விளைவிக்கும் பக்கத்தைப் புறக்கணித்தே ஆக வேண்டும்!

ஆனால் எண்ணெய்களில் உள்ள சத்துக்களை எண்ணெய்வாரியாகப் பட்டியலிட்டு அதன் பயன்களைப் பற்றிச் சொல்பவர்கள் அதை வெப்பப் படுத்துவதால் ஏற்ப்படும் தீங்கையோ, அதில் பொரித்தேடுக்கப் படும் மற்ற உணவுப் பண்டங்கள் அடையும் எதிர்மறையான மாற்றத்தையோ சொல்வதே இல்லை.

அதனால் எண்ணையின் இரண்டு முகங்களையும் மக்கள் காணாமல் போவதால் மக்களை பாதிப்புக்கு உள்ளாக்குவதே எண்ணையின் பணி என்று ஆகிவிட்டது!

Saturday, September 6, 2014

ஆன்மிகத்தில் ஒரு புதுப்பாதை ( 37 )

ஆன்மிகத்தில் இரண்டு நிலைகள்.....

ஆன்மிகத்தில் இரண்டு நிலைகள் உலகெங்கிலும் இருக்கின்றன..

ஒன்று துவக்க நிலை.

இரண்டாவது பண்பட்ட நிலை! 

துவக்க நிலையில் மூட நம்பிக்கைகள் அதிகமாகக் கலந்து இருக்கும்.

இரண்டாவது நிலையில் தத்துவார்த்த சிந்தனைகளும் ஆழ்ந்த அறிவாற்றலும் வாழ்க்கை பற்றிய தெளிவான கண்ணோட்டமும் வெளிப்படும்.

துவக்க  நிலையில் இருக்கும் எண்ணற்ற மக்களை இரண்டாவது நிலைக்கு உயர்த்துவதுதான் மிகச் சிறந்த ஆன்மிகப் பணி ஆகும்! 

ஆனால் அந்தப் பணியைச் சிறப்பாகச் செய்யாமல் அவர்களின் அறியாமையை மேலும் மேலும் வளர்க்கும் விதமாக செய்யப் படும் செயல்களே ஆன்மிகப் பணியாகச் செய்யப்ப்படும் போக்குதான் உலகெங்கிலும் நிலவுகிறது. 

அதை வாழும் வழியாகக் கொண்டு எண்ணற்றவர்கள் வாழும் அளவுக்கு உண்மையான ஆண்மிகப்பணியாகச் செய்பவர்களைக் காண்பது கடினம். 

அதனால் இரண்டாம் நிலை என்பது தத்துவார்த்த விவாதப் பொருளாக மட்டும் இருக்கிறதே தவிர வளரும் ஆன்மிகமாக இல்லை!

அதனால் ஆன்மிகம் என்ற பெயரால் மூட நம்பிக்கைகள்தான் உலகெங்கிலும் தலைவிரித்து ஆடுகிறது. 

அதன்காரணமாக உண்மையான ஆன்மிக சிந்தனைகளை உடைய  உண்மையான ஆன்மிகவாதிகள் என்ன செய்வது என்று வழி தெரியாமல் விழி பிதுங்க வேண்டி உள்ளது!.... 

Friday, September 5, 2014

உணவே மருந்து ( 91 )

தண்ணீர் மாத்திரை! 

நோயாளிகளுக்கு மருத்துவர்கள் மருந்து கொடுக்கும்போது சாப்பாட்டுக்கு முன்னால் இன்ன மருந்தை இன்ன அளவு சாப்பிட வேண்டும். சாப்பாட்டுக்குப் பின்னால் இன்ன மருந்தை இன்ன அளவு சாப்பிடவேண்டும் என்று சொல்வார்கள்.

அது மிகவும் சரியானதே!

காரணம் சில மருந்துகளைக் காலி வயிற்றில் உண்பது நல்லது. சில மருந்துகளை வயிற்றில் உணவு இருக்கும்போது உண்பது நல்லது. அவற்றின் குணம் அப்படி!

ஆனால் சமீப காலங்களில் தண்ணீரையும் சாப்பாட்டுக்கு இவ்வளவு நேரத்துக்கு முன்னால் தான் குடிக்கணும். சாப்பாட்டுக்கு இவ்வளவு நேரத்துக்குப் பின்னால்தான்  குடிக்கணும் என்று சொல்கிறார்கள்.

எதனால் அப்படி?

மருந்து மாத்திரைகளைக்கூட முன்னால் அல்லது பின்னால் என்று ஒரு மருந்துக்கு ஒரு நிபந்தனை மட்டுமே விதிக்கிறார்கள்.

அதுவும் நோயாளிகளுக்கு!

ஆனால் நல்ல நிலையில் வாழும் ஒருவருக்குத் தண்ணீரை சாப்பாட்டுக்கு முன்னால் அல்லது பின்னால் இவ்வளவு நேரம் கழித்து அருந்தச் சொல்வது எதற்காக?

மருந்து மாத்திரைகளைவிடத் தண்ணீரில் பக்க விளைவுகள் அதிகமோ?....

இந்த இடத்தில்தான் நாம் ஒன்றை யோசிக்க வேண்டும்.

ஆதாவது தண்ணீர் என்பது குறிப்பிட்ட நேரம் பார்த்துச் சாப்பிடுவதற்கு மாத்திரைகள் அல்ல!

தாகம் எடுக்கும்போது தண்ணீர் குடிக்க வேண்டும் என்பது தவறா?

தாகம் எடுக்கும் நிலையில் தண்ணீர் குடிக்கக்கூடாது என்பது எப்படி அறிவுபூர்வமான ஒன்று ஆகும்?

இந்த இடத்தில்தான் ஒன்றைக் காணத் தவறுகிறார்கள்.

ஆதாவது சாப்பிடும்போது தண்ணீர் குடிக்கக் கூடாது என்றால்  அப்போது தண்ணீர்த்தாகமும் இருக்கக் கூடாது.

ஆனால் தாகம் எடுக்கிறது தண்ணீரும் குடிக்கிறோம்.

தாகம் இல்லாமல் தண்ணீர் குடிப்பதும் தவறு.

தாகம் எடுத்துத் தண்ணீர் குடிக்காமல் இருப்பதும் தவறு!

அப்படியானால் என்ன செய்ய வேண்டும்.

ஒரே வழிதான் உள்ளது!

ஆதாவது உண்ணும்போது தாகம் எடுக்கக் கூடாது!

அதற்கு என்ன செய்வது?

வேறு என்ன? தாகம் எடுக்காத உணவுப் பண்டங்களை உண்ண வேண்டும்!

ஆதாவது முடிந்தவரை இயற்கை உணவு வகைகளை உண்ண வேண்டும்!

அதைச் சொல்லாமல்  தாகத்தை உருவாக்கும் ஆதாவது தண்ணீர் நிறையத் தேவைப்படும் செயற்கைப் பண்டங்களை உள்ளே திணித்துக்கொண்டே தண்ணீர் குடிக்கவேண்டாம் என்று சொல்வது கொதிக்கும் நீரில் தண்ணீரை ஊற்றாமல் அப்படியே குளியுங்கள் என்று சொல்வதற்குச் சமம்!

அது எப்படிச் சரி?