ஆன்மிகத்தில் ஒரு புதுப்பாதை ( 27 )

ஆன்மிகத்துக்கு அநீதி! 

மதநம்பிக்கை உடையவர்களும் மதப்பற்று உடையவர்களும் அவர்கள் எந்த மதத்தைச் சோர்ந்தவர்களாக இருந்தாலும் தங்களுடைய மதத்தைச் சேர்ந்தவர்களைக்கூட அத்தனை பேரையும் மனதார நேசிப்பதில்லை.

ஆனால் மதநம்பிக்கை இல்லாதவர்களும் மதப்பற்று இல்லாதவர்களும் அனைத்து மதத்தைச் சேர்ந்த அனைத்து மக்களையும் மனதார நேசிக்கிறார்கள்.

ஆனால் அவர்களை எந்த மதத்தவரும் தங்களுக்கு நெருங்கியவர்களாகப் பாவித்து நேசிப்பது இல்லை.

 மாறாக ஆன்மிகத்தின் எதிரிகளாகப் பாவித்து வெறுக்கிறார்கள்.

ஆதாவது நேசிக்கப்பட வேண்டியவர்கள் புறக்கணிக்கப்படுகிறார்கள். 

இது  கொடுமையிலும் கொடுமையல்லவா!

மதமும் மூடநம்பிக்கைகளும் இல்லாமல் ஆன்மிக வாழ்வு மட்டும் வாழ்வது அவ்வளவு இழிவானதா?...

மக்கள் மனம் மாறவேண்டும்!
---------------------------------------------

இது தொடர்பான எனது கூடுதல் கருத்துக்கள்:

கேள்வி: மதம் என்பது மூட நம்பிக்கை போல எழுதியிருக்கிறிர்கள் ஐயா !

பதில்: ஆன்மிகம் அனைத்து மக்களுக்கும் வழிகாட்டும் அம்சமாக விளங்கவேண்டும் நண்பரே!

ஆனால் மதங்கள் மூடநம்பிக்கைகளுக்குக் கொடுக்கும் முக்கியத்துவம் உயர்ந்த ஆன்மிக சிந்தனைகளுக்குக் கொடுத்திருந்தால் இன்று உலகம் வேறு விதமாக இருந்திருக்கும்!

நம்மைப் போன்ற நல்லுணர்வு கொண்டோரையும் பிரித்து வைத்திருக்கிறது பாருங்கள்! அதுதான் அதன் பலம்!...

கேள்வி : ஐயா, நான் கூறியது ஆன்மீகத்தின் பிரிவு அல்லது அடையாளம் மதம் இதில் உங்கள் கருத்து என்ன?அதாவது ஆன்மீகம் என்றால் என்ன? மதம் என்றால் என்ன? பிறகு உயர்ந்த ஆன்மீகம் என்பது பற்றி பர்ப்போம்

பதில் : ஆன்மிகம் என்பது அனைத்து மக்களுக்குமானது!

மதங்கள் அனைத்து மக்களுக்கானது அல்ல!

அதனால் அவற்றை ஆன்மிகம் என்று நான் நினைப்பதில்லை!

உயர்ந்த ஆன்மிகம் என்பது மதங்களையும் மூட நம்பிக்கைகளையும் புறக்கணித்து அனைத்து மக்களையும் அன்பால் அரவணைத்துச் செல்லும் நெறிகளை தர்மங்களாகக்கொண்ட து!

கேள்வி :  ஆன்மீகத்தை அடிப்படையாகக்கொண்டே மதங்கள் தோன்றின.  இங்கு மூட பழக்கவழக்கங்களோ அல்லது வேண்டப்படாத சமூக சீர்கேட்டு பண்பாட்டு முறைகளோ இருந்தால் அவற்றை  ஒதிக்கி வைத்து உலகில் உள்ள அனைத்து மதங்களையும் அதன் கோட்பாடுகளையும் ஆராய்ந்தால் உயர்ந்த ஆன்மீக கோட்பாடுகளை மையப்படுத்தியே கூறப்பட்டிருக்கும்.

ஆனால் மக்கள்  அதை சரியாகப் புரிந்து கொண்டு  கையாள வில்லை.

பழக்கத்தால்  ஏற்பட்ட வேண்டப்படாத மூட பழக்க வழக்கங்கள் ஆன்மீகப்பாதையிலிருந்து,மததின் கோட்பாடுகளிலிருந்து மக்களைப் பிறழச் செய்து விட்டன.

இதை வைத்து ஆன்மீகம் தனித்து, மூட பழ்க்கவழ்க்கங்களையும் ,மதங்களையும் ஒன்றாக பாவித்து , இதை இரண்டையும் தவிர்த்தது ஆன்மீகம் என்பதை என்னால் ஏற்க முடியவில்லை . அதாவது மதம் என்பது ஆன்மீகத்தின்ஒரு பிரிவு.  ஆகவே மதம் வேறு  ஆன்மீகம் வேறு என்பதை நான் ஏற்கவில்லை .

 அப்படி மததிற்குள் வராதர்கள் நாத்தீக வாதிகள்!அங்கே (நீங்கள் சொல்லும் ) ஆன்மீகம் எப்படி?

பதில்:இதைத்தான் நான் தலைப்பில் சொல்லி இருப்பது!

ஒரு மதத்தின் கீழ் வராதவன் நாத்திகவாதி !

அப்படியா?

அப்படியானால் மதங்களின்கீழ் உள்ளவன் ஆன்மிகவாதி!

ஆதாவது மதங்கள் சொல்வது ஆன்மிகம்!

உலக மக்கள் அனைவரையும் கூறுபோட்டு பிரித்துவைத்திருக்கும் மதங்களின் தர்மம் எப்படி ஆன்மிகம் ஆகும்?...

எந்த மதத்தவன் தன்னுடைய மத தர்மப்படி நடக்கிறான்?

உலகில் ஒரு மனிதன்கூடப் பின்பற்றி நடக்காத மததர்மங்கள்தான் ஆன்மிகம் என்றால் அது ஆன்மிகம் என்ற உயர்ந்த தத்துவத்துக்கே அவமானம்!...

 உலகில் ஒருவர்கூட தனது மதத் தர்மங்களினபடி நடப்பதில்லை என்றால் அதன் பொருள் என்ன?

எந்த மதமும் மனிதன் நடக்கும் வழியைச் சொல்லவில்லை என்பதே!

அப்படியானால் என்ன செய்ய வேண்டும்?

நடக்கச் சாத்தியமான தர்மங்களின் வழிநின்று நடக்கவேண்டும்.

அதுதானே ஆன்மிகம்?

அதற்கு மதம் என்ற வேடம் எதற்கு?....

 ஒவ்வொரு மனிதனும் அனைத்துலக மக்களின்மேல் அன்பு செலுத்தும், அனைத்து உலக மக்களும் ஒவ்வொருவர்மேலும் அன்பு செலுத்தும் ஒரு தர்மத்தை விட எது உயர்ந்ததாக இருக்க முடியும்?

அதைவிடச் சிறந்த ஆன்மிகமாக எது இருக்க முடியும்?...

ஒவ்வொரு மதத்தின் தர்மங்களையும் மற்ற மதத்தவர்கள் ஏற்றுக் கொள்வது இல்லை!

அப்படியானால் என்ன பொருள் ?

எந்த மதத்தையும் உலகம் உண்மையில் ஏற்றுக்கொள்ளவில்லை என்பதுதானே?

ஆன்மீகத்தை அடிப்படையாகக்கொண்டே மதங்கள் தோன்றின என்று சொல்கிறீர்கள்.

அப்படித் தோன்றி அதன்பின் சரியான நெறி நின்று நடக்கமுடியவில்லை என்றால் அவற்றைப் புறக்கணித்துவிட்டு அனைத்து மதங்களுக்கும் அடிப்படை ஆதாரமாக துவக்கத்தில் இருந்த அடிப்படையான ஆன்மிகத்தின் வழி நிற்பது எப்படி நாத்திகம் ஆகும்?....

கேள்வி : ஒவ்வொரு மதத்தின் தர்மங்களையும் மற்ற மதத்தவர்கள் ஏற்றுக் கொள்வது இல்லை என்கிறீர்கள்!

மத வெறியர்கள்தான் ஏற்பதில்லை. ஆனால் மத்தை தோற்றுவித்தவர்கள் எண்ணப்படி  அல்லது அதன் அடிப்படை கோட்பாடுகளின்படி யாவும் ஒன்றே!

மனிதன் பிரித்ததினால் மதங்கள் எப்படிதவறாகும்? யாவும் ஒரே கோட்பாடே!

முறையாக ஒவ்வொரு மதததினரும் பின்பற்றினால் அனைத்து மக்களும் ஒன்றாகிவிடலாம் என்பது எனது அசைக்கமுடியாத நம்பிக்கை ஐயா!

பதில் : ஆன்மிகத்தில் இருந்துதான் மதங்கள் பிறந்தன என்றீர்கள்.

அப்படியானால் அந்த மூலத்தை ஏன் தனியாகக் கடைப்பிடிக்க முடியாது? அதை ஏன் நாத்திகம் என்கிறீர்கள்?

உலகில் உள்ள ஏதாவது ஒரு மதத்தைப் பிசகாமல் பின்பற்றும் ஏதாவது ஒரு மனிதரைச் சந்தித்த அனுபவம் உண்டா?...

பொய்களை ஏற்றுக்கொள்ளக் கொஞ்சமும் தயங்காத மக்கள் உண்மைகளை ஏற்றுக்கொள்ள ஏன் அச்சப்படுகிறாகள் என்பதுதான் பெரிய அவலம்!

உடம்பில் இருக்கும் அழுக்கைக் கழுவ நினைக்கும் நாம் ஏன் உள்ளத்தில் இருக்கும் அழுக்கை நீக்கத் தவறுகிறோம்?

எந்த ஒரு நிலையிலும் தவறுகளில் இருந்து சரியான நிலைக்கு மாறிச் செல்வதே உயர்ந்த ஆன்மிகம்!

அத்தகைய உயர் நிலைக்குச் செல்ல விடாமல் தடுக்கும் நிலைகள் ஆன்மிகத்துக்கு எதிரானவை அல்லவா?...

சொல்லும் செயலும் நேர்மையான சிந்தனைகளின் வழி வந்தால்தான் சிறப்பு!

சொல்லும் செயலும் நேர்மையற்றவர்களின் வழிகாட்டுதலின் வழி நடந்தால் அது எப்படித் தூய ஆன்மிகம் ஆகும்?

எல்லா மதங்களும் ஆன்மிகத்தைத் தான் வலியுறுத்துகின்றன என்றால் ஒரு மதத்தவர் இன்னொருமதத்துக்கு மாறிச் செல்வதை எந்த மதம் மகிழ்வுடன் வரவேற்கிறது?...

எல்லா மத்தத்தவர்களும் எல்லா வழிபாட்டுத்தலங்களுக்கும் சென்று வழிபடலாமே!....ஏன் அப்படிச் செய்வது இல்லை?...

தத்துவம் ( 14 )

தவறான நம்பிக்கையும் சரியான நம்பிக்கையும்

வாழ்க்கை என்பதே பல்வேறு விதமான நம்பிக்கைகளைகளால்தான் முன்னோக்கி செலுத்தப்படுகிறது. அப்படிப்பட்ட நம்பிக்கைகள் எதுவும் அற்ற ஒரு மனிதர் உலகில் இருக்கமுடியாது. வாழவும் முடியாது. 

ஆனால் அனைவரின் நம்பிக்கையும் ஒரேமாதிரி இருப்பதில்லை. காரணம் ஒவ்வொருவருடைய வாழ்க்கை அனுபவங்களும் கற்ற கல்வியும் ஒவ்வொருவிதமான புரிதலைக் கற்றுக் கொடுத்திருக்கின்றன.

அதில் சரியானதும் உண்டு தவறானதும் உண்டு.

நாம் செய்யவேண்டியதெல்லாம் எது சரியானது எது தவறானது என்று இனங்கண்டு பிரித்து அறிவதே!

இயற்கை விதிகளுக்கும் இயற்பியல் விதிகளுக்கும் வேதியியல் விதிகளுக்கும் உயிரியல் வாழ்க்கை விதிகளுக்கும் பரிணாம வளர்ச்சிக்கும் நடைமுறை அனுபவங்களுக்கும் எதுவெல்லாம் பொருந்துகிறதோ அவையெல்லாம் சரியான நம்பிக்கைகள்.

எந்த நம்பிக்கைகள் எல்லாம் அவற்றுக்குப் பொருந்தவில்லையோ அவையெல்லாம் தவறான நம்பிக்கைகள்.

உதாரணத்துக்குச் சிலவற்றை எடுத்துக்கொள்வோம்.

உயிரினங்களில் ஒன்றான பறவை வானத்தில் பறப்பதைப் பார்த்து இன்னொரு உயிரினமான மனிதன் தன்னால் பறக்க முடியவில்லையே என்று நினைக்கிறான்.

எதனால் பறவையால் பறக்க முடிகிறது, எதனால் தன்னால் பறக்க முடியவில்லை என்று ஆராய்கிறான்.

அப்போது அறிவியலி;ல் வளர்ந்துகொண்டிருந்த மனிதன் பறவையினால் தனது இறக்கைகளைக் கொண்டு தனது எடைக்கும் அதிகமான விசையைக் காற்றை நோக்கிக் கீழ்நோக்கிச் செலுத்துவதன் மூலம் புவியீர்ப்புக்கு எதிராக மேலெழும்பிப் பறக்க முடிகிறது. ஆனால் தனது உடலில் அத்தகைய அமைப்பு இல்லாததால் பறக்க முடியவில்லை என்பதை உணர்கிறான்.

அப்படி உணர்வதோடு ஒரு நம்பிக்கையும் கொள்கிறான்.

ஆதாவது தனது அறிவியல் தொழில் நுட்பத்தால் புவியீர்ப்பு விசைக்கு எதிராகச் செயல்படும் ஒரு கருவியைக் கண்டுபிடித்தால் தானும் பறவையைப்போல் வானில் பறக்க முடியும் என்று நம்பிக்கை கொள்கிறான். 

அதுதான் நம்பிக்கை! அதுதான் சரியான நம்பிக்கை! 

காரணம் அந்த நம்பிக்கைக்கு ஆதாரமாக அறிவியல் கண்டுபிடிப்புகளின் பல்வேறு அம்சங்கள் துணைக்கு வருகின்றன. 

அதன் காரணமாக அந்தச் சிந்தனையின் வளர்ச்சிப்போக்கு நாளடைவில் அறிவியல் தொடர்பான ஆய்வுகளால் வெற்றிகரமாக நிறைவேறுகிறது.

அதே  சமயம் ஏதோ ஒரு தேவதையின் அருளால் பறவையால் விண்ணில் பறக்க முடிகிறது. தனக்கும் அத்தகைய ஒரு தேவைதையின் அருள் கிடைத்தால் விண்ணில் பறக்க முடியும் என்று நம்பினால் அது தவறான நம்பிக்கை! 

அப்படிபட்ட தேவதையின் அருளால் முற்காலத்தில் மக்கள் வானில் பறந்துகொண்டு இருந்தார்கள் என்று நம்பினால் அது தவறான நம்பிக்கை!

அதேபோல மனித உடலின் எந்தஒரு பகுதியில் நோய் வந்தாலும் அதைக் குணப்படுத்த சிகிச்சை முறைகளும் மருந்துகளும் இருப்பதால் இன்னும் கண்டறியப்படாத எந்த நோய்க்கும் எதிர்காலத்தில் நிச்சயம் மருத்துவம் வந்துவிடும் என்று நினைத்தால் அது சரியான நம்பிக்கை! 

ஆனால் செத்து கெட்டுப்போன உடலைக்கூட எதிர்காலத்தில் உயிர்ப்பித்து விடலாம் என்று ஒருவர் நினைத்தால் அது தவறான நம்பிக்கை. படைப்புக் கடவுளின் மற்றும் காக்கும் கடவுளின் அருள் இருந்தால் போதும் என்று நினைத்தாலும் அதுவும் தவறான நம்பிக்கைதான்! ! 

ஒரு விதையை அல்லது தாவரத்தின் ஒரு பாகத்தை வேறொரு இணக்கமான தாவரத்துடன் குறிப்பட்ட முறையில் இணைப்பதன் மூலம் பதுவகையான தாவரத்தை உருவாக்கலாம் என்று நம்பினால் அது சரியான நம்பிக்கை.

காரணம் அத்தகைய செயல்பாடுகள் இயற்கையில் உள்ளன. அதில் பலவற்றை ஏற்கனவே அறிந்திருக்கிறோம் என்பது ஆதாரம். அதனால்  இன்னும் அறியப்டாத இலக்குகளை அடைவோம் என்ற நம்பிக்கையில் பொருள் இருக்கிறது. உயிரினமும் அப்படியே! 

ஆனால் உலகில் உள்ள அத்தனையும் அணுக்களால் ஆனது. அவற்றின் குறிப்பிட்ட வகையான சேர்மானம்தான் அனைத்துப் பொருட்களாகவும் உயிர்களாகவும் காட்சி தருகிறது. ஆகையால் பூமியில் கிடைக்கிற கனிமங்களைக் கொண்டு அவறிறில் அடங்கியுள்ள அணுக்களைக் கொண்டு குறிப்பிட்ட முறையில் ஒன்று சேர்ப்பதன் மூலமாக ஒரு தாவரத்தையோ உயிரினத்தையோ அறிவியல் ஆய்வுக் கூடத்திலேயே உருவாக்கி விடலாம் என்று நினைத்தால் அது தவறான நம்பிக்கை! 

காரணம் உலக உயிரின வாழ்க்கை இயற்கைப் போக்கிலான உருவாக்கமும் அதன் தொடர்ச்சியுமே தவிர திட்டமிட்டு உருவாக்கப்பட்ட ஒன்று அல்ல. 

மனிதனின் அறிவாற்றலால் இன்று எதையெல்லாம் முடியாது என்று நினைக்கப் படுகிறதோ அதையெல்லாம் வருங்காலத்தில் நிச்சயம் உருவாக்கப்படும் என்று நினைக்கிறார்கள். 

அது தவறான நம்பிக்கை! 

இன்றைய அல்லது கடந்த கால அனுபவங்களில் இருந்து பெற்ற அறிவைக்கொண்டு சரியான திசையில் இயற்கைப் போக்குக்கு முரண்படாமல் சிந்தித்தால் செயல்பட்டால் இன்னும் அறியப்படாத எத்தனையோ இலக்குகளை அடைய முடியும். 

காரணம் அது இயற்கையுடன் முரண்படுவதில்லை! சரியான பாதையில் தான் அறிவு செலுத்தப்படுகிறது. 

அப்படியல்லாமல் கடந்த காலத்தில் கற்பனையாக இருந்தவையெல்லாம் பின்னாளில் சாதிக்கப்பட்டிருக்கிறது. அதனால் இப்போது நமது மனதில் தோன்றும் கற்பனைகள் எதுவென்றாலும் அது பின்னளில் நிறைவேற்றப்படும் என்று நினைத்தால் அது நடக்காது. 

காரணம் அந்த எண்ணம் கடந்தகால அனுபவய்களுடனும் இயற்கையின் போக்குகளுடனும் முரண்படுகிறது! 

சரியான நம்பிக்கைகள் எல்லாம் அறிவியலுக்கும் இயற்கைக்கும் வாழ்வுக்கும் வளர்ச்சிக்கும் இணக்கமாக இருப்பதால் தொடர்ந்து முன்னோக்கி அனைத்தையும் இட்டுச் செல்லும். அவை அறிவியல் அடிப்படையான நம்பிக்கைகள்!

தவறான நம்பிக்கைகள் வரலாறு உட்பட அனைத்தையும் பின்னோக்கி இழுத்துச்செல்ல முயல்பவை! அறிவியலுக்கு எதிரானவை. 

அவையே மூட நம்பிக்கைகள் எனப்படும்!

ஒருவர் அறிவியல்சீதியாகச் சிந்திக்கத் தவறினால் அவர் மூட நம்பிக்கையில் வீழ்ந்தே தீருவார்! 

ஆனால் வருந்தத் தக்க விஷயம் என்னவென்றால் நிறைய அறிவியலாளர்கள் அறிவியல் கற்ற அளவு அறிவியல் ரீதியாக அனைத்தைப்பற்றியும் சிந்திக்கக் கற்றுக்கொள்ளவில்லை! 

உண்மையில் அது மூடநம்பிக்கைக்கும் மூட நம்பிக்கையாளர்களுக்கும் கிடைத்துக்கொண்டிருக்கும் வெற்றிமேல் வெற்றி ஆகும்.

தத்துவம் ( 13 )

தன்மானமும் தன்னகங்காரமும்.    

தன்மானம் உள்ள எவரும் தனது தவறுகளைத் துணிவுடன் ஏற்றக்கொள்ளத் தயங்க மாட்டார்கள். தனது தவறுகளை மூடிமறைக்க உண்மைக்கு மாறான முயற்சியைச் செய்யவும் மாட்டார்கள். 

ஆனால் தன்னகங்காரம் உடையவர்கள் தமது தவறுகளை ஏற்றக்கொள்ளும் துணிவற்றவர்கள் ஆவர்கள். தங்களது தவற்றை மூடிமறைப்பதற்காகவும் பழியைப் பிறர்மேல் போடுவதற்காகவும் எத்தகைய பொய்யையும் கூறத் தயங்க மாட்டார்கள். 

அதேபோலத் தன்மானம் மிக்கவர்கள் உண்மைக்கும் நியாயத்துக்கும் எதிராகத் தாம் நடப்பதையோ பிறரால் எண்ணப்படுவதையோ விரும்பவும் மாட்டார்கள். மாறாக அதை மானக்கேடாக நினைப்பார்கள். 

ஆனால் தன்னகங்காரம் மிக்கவர்கள் தாம் நினைப்பதையே நியாயம் என்று கருதுவதோடு மற்றவர்கள் தங்களைப்பற்றி என்ன நினைத்தாலும் தம்முடைய நிலைதான் சரி என்று சாதிப்பதுதான் தன்மானம் என்று கருதிச் செயல்படுவார்கள்.

தன்மானம் அவசியமான பண்பு.

தன்னகங்காரம் திருத்திக்கொள்ள வேண்டிய பண்பு!

அரசியல் ( 49 )

ஒரு நாட்டின் தலைவர்களில் பெரும்பாலோர் பொய்யர்களாகவும் திருடர்களாகவும் மோசடிப் பேர்வழிகளாகவும் உள்ள ஒருநாட்டில் அரசுகள் எப்படி இருக்கும்?

அதைச் சகித்துக்கொண்டு வாழும் நாட்டுப்பற்றுடைய நல்லவர்களின் மனம் எப்படி இருக்கும்?.....

நாட்டில் தவறுகள் அடி முடி தெரியாத படி உயர்ந்து நிற்கின்றன !

அதன் மூலாதாரத்தை அறிவதும் ஒழித்துக்கட்டுவதும் தவிர்க்கமுடியாத தேவைகள்!

சட்டத்தை மீறாமல் ஒரு மனிதன் வாழ முடியாத அளவு நியாயங்கள் செத்துக்கொண்டிருக்கின்றன.

அதற்கு உயிர்கொடுக்க வேண்டும் என்றால் நாட்டிலுள்ள அப்பழுக்கற்ற தேசப் பற்றாளர்கள் கூடி நாட்டின் மானத்தையும் மக்களின் வாழ்வையும் மேம்படுத்த ஒரு பொதுக் கருத்தையும் திட்டத்தையும் உருவாக்க வேண்டும்!

தவறுகளுக்கு இடம்கொடுக்காத விதிகளுடன் ஒரு விடுதலை இயக்கத்தைத் துவங்கவேண்டும்!

அதுதான் நாட்டைக் குற்றவாளிகள் கைகளில் இருந்து விடுவிக்கும். குற்றங்களை ஒழித்துக்கட்டும்.

அரசியல் ( 48 )

மறைந்தவர்கள் அனைவரும் நல்லவர்களா?

நமது நாட்டில் மக்கள் மனங்களில் ஒரு பெரும் நோய் உள்ளது. அல்லது உருவாக்கப்பட்டிருக்கிறது. 

ஆதாவது ஒருவர் தன் வாழ்நாளில் புகழ்பெற்றவராக இருந்துவிட்டால் அவர் நல்லவராயிருந்தாலும் சரி, கெட்டவராக  இருந்தாலும் சரி அவரைப் புகழ்பாடுவது அல்லது விமர்சிக்காமல் விடுவது. 

இந்த இரண்டுக்கும் காரணம் நடைமுறைவாழ்வில் காண்பவர்களுள் மக்களின் மனதுக்குப் பிடித்தமானவர்களாக வேறு யாரும் தெரியாமல் போவதே!

அது ஏன் செத்துப் போனவர்கள் எல்லோரும் நல்லவர் ஆகிறார்கள்? அவர்கள் தவறே செய்தததில்லையா? நிச்சயம் தவறு செய்திருப்பார்கள். தவறே செய்hமல் வாழும் ஒரு மனிதரை நாம் காணவே முடியாது. அப்படியொருவர் இருந்தால் அவர் உயிருள்ள உணர்வுள்ள ஒரு மனிதராக இருக்கமுடியாது. காரணம் தவறும் செய்பவன்தான் மனிதன். 

தவரே செய்யாதவன் ஒருவன் உலகில் இருந்தால் அவன் கற்றுக்கொள்ள என்ன இருக்கிறது? அவன் திருத்திக்கொள்ள என்ன இருக்கிறது? அவன் நல்லவன் அல்லது கெட்டவன் என்று எந்த அளவுகோலைக் கொண்டு மதிப்பிட முடியும்? பிறருக்கு வழிகாட்டத்தான் அவர்களுக்கு என்ன அறிவிருக்க முடியும்?

ஆதாவது வாழும் மனிதரில் இரண்டு வகைதான் இருக்க முடியும். முதலாவது தவற்றை உணர்ந்து திருத்திக்கொண்டு சரியான பாதையில் பயணம் செய்பவர்கள். இரண்டாவது தனது தவறுகளை உணராமலும் திருத்திக் கொள்ளாமலும் மேலும் மேலும் தவறான பாதையில் செல்பவர்கள். 

முதல்பாதையில் எந்த அளவு ஒருவர் பயணிக்கிறாரோ அந்த அளவு தனக்குத் தானே மட்டுமல்ல பிறருக்கும் வழிகாட்டக்கூடியவராக வாழ்கிறார். மனித சமுதாயத்துக்கே வழிகாட்டக்கூடியவர்களாக வாழ்ந்துகொண்டிருப்பவர்களும் வாழ்ந்து மறைந்தவர்களும் எந்தக் காலத்திலும் இருந்தார்கள். இப்போதும் இருக்கவே செய்கிறார்கள்.

அதேபோல இரண்டாவது முறையின்படி வாழ்வை வாழ்பவர்கள் அதில் எந்த அளவு வலுவானவர்களாக இருக்கிறார்களோ அந்த அளவு சரியற்ற வாழ்வை வாழ்கிறார்கள் என்பது பொருள் அவர்கள் மக்கள் மத்தியில் நிறைய அறியப்பட்டிருந்தாலும் மதிப்புமிக்கவர்களாக அறியப்படாமல் எந்த அளவு தவறானவர்களோ அந்த அளவுக்க இழிவானவர்களாக எண்ணப்படுவார்கள்.

சரி, சமுதாயத்துக்கு உகந்த மேன்மக்கள் யார் என்பதை எப்படி மதிப்பிடுவது? 

பலராலும் பாராட்டப்படுவதை வைத்தோ அவருக்கு இருக்கும் வசதி வாய்ப்புக்களை வைத்தோ அவருக்கிருக்கும் அதிகாரம் அல்லது புகழை வைத்தோ மதிப்பிடலாமா? நிச்சயம் முடியாது? காரணம் அதனால் எந்தப்பயனும் இல்லை!

அவர் வாழும் அல்லது வாழ்ந்த இந்த சமுதாயத்தில் அவருடைய வாழ்வு எப்படிப் பட்டதாக இருந்தது? சமுதாயத்தால் அவர் நன்மை அடைந்தாரா? அல்லது சமுதாயம் அவரால் நன்மை அடைந்ததா? அவருடைய சொல்லும் செயலும் எப்படிப்பட்டதாக இருந்தன? 

ஒரு மரம் தான் அழியும் முன்பு தன்னைப்போல் பல மரங்களை உருவாக்கும் எனதர விதைகளை நிலத்தில் விட்டுவிட்டுத்தான் மறைகிறது. 

தான் இருக்கும்போதே தன்னைப்போல் வேறு பல மரங்களும் வளர்நத பின்புதான் மறைகிறது. 

அதுபோல ஒரு மனிதன் தான் வாழுங்காலத்தில் தனக்குப்பின் தன்னைப்போலவே சந்ததிகளை உருவாக்கி விட்டுச் செல்வதுபோல சமுதாய வாழ்வில் தான் போற்றிவளர்த்த பண்புகளைப் பின்பற்றுவோரும் அடுத்த தலைமுறையில் பல்கிப்பெருகும் விதத்தில் வாழ்ந்து சென்றிருக்கவேண்டும். 

அதற்கு அவர் உருவாக்கிய அல்லது போற்றிப் பாதுகாத்த அல்லது பின்பற்றி வாழ்ந்த உயர் பண்புகளும் கருத்துக்களும் மக்கள் மனதிலே விதைகளைப்போல் விழுந்து முளைவிட்டிருக்க வேண்டும்.

அத்தகைய நல் விதைகளை சமுதாயத்தில் யார் விதைத்துவிட்டு மறைகிறார்களோ அவர்கள் தான் சரியாக வாழ்ந்தவர்கள். அவர்கள்தான் போற்றத்தகுந்தவர்கள் அவர்களின் கருத்துக்கள்தான் சமுதாயத்தை வழிநடத்தும் தத்துவங்கள்!

ஆனால் அத்தகைய பண்பாடுகள் எல்லாம் மக்கள் மனதில் இல்லாததால் முன்னோடிகளால் வளர்க்கப்படாததால் மக்களின் சராசரி மனநிலையும் அறிவுத் தரமும் எந்த மட்டத்தில் இருக்கறிதோ அதைப் பிரதிபலிப்பதாகத்தான் அவர்களின் சமுதாயத் தேர்வும் அமைகிறது. 

அவர்களின் வாழ்க்கையின் பெரும்பாகம் உயர் பண்பாட்டு வளர்ப்புக்குக் கொடுக்கப்படாததால் அவர்கள் முக்கியத்துவம் கொடுத்த சாதாரண மனிதனின் வாழ்க்கைத் தேவைகளுக்கு ஏற்புடைய நிலைமைகளை நல்லதென்றும் அப்படியல்லாததைக் கெட்டதென்றும் நினைகிறார்கள்.

 அந்த மனநிலையில் அத்தகைய உதவி யார் தமக்கு அளிக்கக்கூடும் என்று அவர்கள் மனதுக்குப் படுகிறதோ அவர்களைப் புகழ்பெற்றவர்களாhகக் கருதுகிறார்கள்.

முன்பு அப்படி உயர்வாழ்வு வாழ்ந்தவர்களாக யார் இவர்கள் மனதுக்குப் படுகிறார்களோ  அல்லது அத்தகைய எண்ணம் உருவாக்கப்பட்டிருக்கிறதோ அவர்களைப் போற்றித் துதிபாடுவதோடு அத்தகையவர்களை விமர்சனத்துக்ககு அப்பாற் பட்ட மகான்களாகவும்  எண்ணுகிறார்கள். 

ஆனால் அத்தகைய பொய்யான மதிப்பீடுகளுக்கும் உண்மை நடப்புகளுக்கும் பெரும்பாலும் சம்பந்தம் இல்லை!

இத்தகைய இழிநிலை  இருப்பதால் சமுதாயத்தின் மதிப்புக்கு உரியவர்களாகத் தீயவர்களும் உண்மையில் சமூக விரோதிகளும்கூட வரமுடிகிறது.

குற்றவாளிகள்கூட வணங்கப்படுகிறார்கள்! 

நாடு எப்போது உருப்படும்?.....

தத்துவம் ( 12 )

அறிவியலின் புது எதிரிகள்!

அறிவியலை மூட நம்பிக்கை என்ற குடுக்கைக்குள் அடைத்தே தீருவது என்று உலகம் முழுக்கவும் பலவகையிலும் பலரும் கங்கணம் கட்டிக்கொண்டு கோதாவில் இறங்கியிருக்கிறார்கள் போல் உள்ளது.

இதில் தொலைகாட்சி முக்கியப் பங்கு ஆற்றுகிறது. மற்ற ஊடகங்களும் திட்டமிட்டே தீவிரமாக இறங்கி உள்ளன!

சமூக வலைத் தளங்களில் கண்மூடித்தனமாக இந்தப் பிரச்சாரங்கள் நடக்கின்றன! 

இவர்கள் அறிவியலை எதிர்ப்பது இல்லை! அறிவியலின் அற்புதங்களை விளக்கிக்கொண்டே அறிவியல் வேடம் தரித்துகொண்டு மூடநம்பிக்கைகளை அறிவியல் அடிப்படையானது என்று விளக்கி மக்களை முட்டாளடித்துக்கொண்டு உள்ளார்கள்.

பழங்கால மக்கள் நவீன அறிவியலை அறிந்திருந்தார்கள் என்பதும், காலப்பயணம்தான்தான் அறிவியல் பேரறிஞர்களுக்கு அறிவாற்றலை வழங்கி இருக்கலாம் என்பதும், மாயன்கள் வேற்றுக் கிரக வாசிகளுடன் தொடர்பு வைத்திருந்தார்கள் என்பதும் சித்தர்கள் அணுத் தொழில்நுட்பத்தை அறிந்திருந்தார்கள் என்பதும் , புராதன காலத்தில் விமானத் தொழில் நுட்பம் அறிந்திருந்தார்கள் என்பதும் அத்தகைய கட்டுக் கதைகளே! 

மூட நம்பிக்கைகளை நம்புபபவர்களைவிட அவற்றைப் பச்சையாகப் பிரச்சாரம் செய்பவர்களைவிட இந்த அறிவியல் வேடதாரிகள்தான்  அறிவியல் சிந்தனைகளுக்கு ஆபத்தானவர்கள்!...

மூடநம்பிக்கையாளர்கள் அறிவியல் சிந்தனைகளை  நேரடியாகக் கழுத்தை நெரிப்பவர்கள்.

ஆனால் இந்த அறிவியல் வேடதாரிகளோ அறிவியல் சிந்தனைகளுக்கு நண்பனாக நடித்துக் கொல்லுபவர்கள் !

எச்சரிக்கையாக இல்லாவிட்டால் அறிவியலின் அத்தனை பயன்களையும் அனுபவித்துக்கொண்டே அறிவியல் எண்ணங்களைமட்டும் மூடநம்பிக்கைகளுக்கு அடிமையாகவே என்றென்றும் வைத்திருப்பார்கள்!...

இத்தகைய ஏமாற்று வேலைகளை முறியடித்து அறிவியல் சிந்தனைகளையும் அறிவியலுக்கு முரண்படாத ஆன்மிகத்தையும் வளர்க்கவேண்டியது அறிவாற்றல் மிக்க ஒவ்வொருவரின் கடமை ஆகும்!

--------------------------------------------------------------------

இது தொடர்பான விவாதத்தில் எனது பதில்கள்.....

கேள்வி: இந்தப் பதிவின் நோக்கம் இப்பொழுது இருப்பதை விட உயர்ந்தத் தொழில் நுட்பம் இருந்திருக்காது என்றப் பார்வை இந்தப் பதிவில் உள்ளது.

பதில்: வெறும் கை, கால்,பற்களால் போராடிக்கொண்டிருந்த ஆதிமனிதன் கரடு முரடான கற்களைப் பயன்படுத்தத் துவங்கியபோதே தொழில்நுட்பம் துவங்கி விட்டது!.

அதனால் தொழில்நுட்பம் இல்லாத காலம் என்று மனித பரிணாம வரலாற்றில் எதுவும் இல்லை!

ஆனால் ஒவ்வொரு காலகட்டத் தொழில் நுட்பமும் அதற்கு முந்தியதைவிட நவீனமாகவும் பின்தையதைவிடப் பழமையாகவும்தான் இருந்தன.

அதுதான் சாத்தியமும்கூட!

அதனால்தான் நவீன தொழில்நுட்பத்தைப் பண்டைய மக்கள் அறிந்திருக்க வாய்ப்பில்லை என்கிறோம்.

கேள்வி: சில தொழில்நுட்பம் எதோ ஒருகாரணத்தால் மறையலாம்.. ப்ரம்மீடு போன்றவை தொழில் நுட்பம் இருந்தமைக்கு ஆதாரம். அவனுக்குப் ப்ரம்மீடுக்கான தேவை என்ன???

பதில்: தேவைகள் இல்லாமல் எதுவும் நடப்பது இல்லை!

பிரமிடுக்கான தேவை இருந்தது.

அதைக் கட்டிமுடிப்பதர்க்கான மனித சக்தியும் அதைச் செய்விப்பதர்க்கான அதிகார அமைப்பும் இருந்ததால்தான் கட்டி முடிக்கப்பட்டது!

அதே சமயம் அது நவீனத் தொழில் நுட்பத்தைப் பயன்படுத்திக் கட்டப்படவில்லை!

கேள்வி: எல்லாரையும் விட ஐன்ஸ்டீன் அறிவாளியாக இருந்திருக்கலாம்.. அவர் எதாவது ஒரு உபகரணம் உருவாக்கிப் பயன்படுத்தி அதை யாருக்கும் கற்பிக்காமல் சென்றிருந்தால் அவருடன் அந்தத் தொழில்நுட்பம் முடிந்து போயிருக்கும்..

பதில்: ஐன்ஸ்டீன் இல்லாமல் இருந்திருந்தாலும் இன்றைய உலகம் இன்றுள்ளதுபோல்தான் இருக்கும்!

ஒரு கொத்தனார் இல்லாவிட்டால் அவர்மூலம் கட்டப்பட்ட மாளிகை கட்டப்பட்டிருக்காது என்பது சரியல்ல!

கேள்வி: பிரமிடுக்கான தொழில்நுட்பம்  இன்று இல்லை. அப்போதைய பொருட்களைக்கொண்டு அவ்வளவு வலிமையாக இப்போது கட்ட முடியாது!

பதில்:இப்போதைய தொழில்நுட்பத்தைக் கொண்டு ஒரு பிரமிட்டை பழங்காலப் பிரமிட் போலவே வலிமையாகக் கட்ட நிச்சயம் முடியும்!

கேள்வி: இப்பொழுது எப்படி என்று எனக்குத் தெரியாது அனால் நிச்சயமாக 500 ஆண்டுகளுக்கு முன் முடியாது.

பதில்: ஏன் முடியாது? நிச்சயம் முடியும்! அந்த இடைக்காலத்தில் கண்டறிந்த கூடுதல் தொழில் நுட்பங்களின் துணையுடன் கொஞ்சம் குறைந்த பணிச் சுமையில் சிமெண்ட் இல்லாமல் கட்டப்பட்டிருக்கும்!

ஒவ்வொரு காலகட்டத் தொழில் நுட்பமும் அதற்கு முந்தியதைவிட நவீனமாகவும் பிந்தையதைவிடப் பழமையாகவும்தான் இருந்தன. என்று நான் சொன்னதை கணக்கில்கொண்டால் மட்டுமே அல்லது அது தவறு என்று மெய்ப்பித்தால் மட்டுமே சரியாகப் புரிந்துகொள்ள  முடியும்.

 பழையன கழிதலும் புதியன புகுதலும் என்பதுதான் வாழ்க்கை விதி! அதற்கு அறிவியல் தொழில் நுட்பம் விதிவிலக்கு அல்ல! அதனால் பழமை நவீனத்தைவிட மேம் பட்டதாக அல்லது இணையாக இருக்க முடியாது !

கேள்வி: தொழில்நுட்பம் படிப் படியாக வளரும் என்றால்.. ஒரு கேள்வி ப்ரம்மீடு காலத்திலிருந்து ஒவ்வொரு காலகட்டத்திலும் எப்படி வளர்ந்தது என்பதை விளக்க முடியுமா?

பதில்: படிப்படியாக விளக்குவது முடியாத விஷயம் அல்ல!

ஆனால் வளர்ச்சியும் முன்னேற்றமும் படிப்படியாகத்தான் அனைத்துத் துறையிலும் நிகழ்கின்றன.

அது அதல பாதாளத்திலிருந்து ஒரே பாய்ச்சலாக துண்டித்துக்கொண்டு பாய்ந்து சென்று வேறொரு நிலையை அடைவதில்லை.

அடையவும் முடியாது!

ஒவ்வொரு காலகட்டத்தில் ஏற்படும் மாற்றத்துக்கு முன்னது காரணமாகவும் பின்னது விளைவாகவும் இருக்கும்! காரணம் பழமை! விளைவு புதுமை!

அப்படியொரு தொடர்பு இல்லாமல் இடைவெளி விட்டால் மனித நாகரிகம் பழைய காட்டுமிராண்டிக் காலத்திய நிலைக்குள் வீழ்ந்திருக்கவேண்டும்.

அப்படி விழவில்லை.

ஆகவே சீராக அல்லது வேகமாக முன்னேறித்தான் வருகிறோம்.

ஆன்மிகத்தில் ஒரு புதுப்பாதை ( 26 )

கடவுள் நம்பிக்கை!  

கடவுளை நம்புபவர் யாரும் இருப்பதாகத் தெரியவில்லை!....

அப்படி இருப்பது உண்மையானால் இத்தனை கோவில்கள் உள்ள உலகில் கடவுளுக்கு ஒரு கோவில் இருந்திருக்கும்!

கடவுளை வேண்டிப் பிரார்த்தனைகள் நடந்திருக்கும்!

கடவுளுக்காக ஒரு சிலையாவது இருந்திருக்கும்!

கடவுளுக்கு ஒரு திருவிழாவாவது நடந்திருக்கும்!

கடவுளுக்காக தாடிகள் விடப்பட்டு சிலபல மொட்டைகளாவது அடிகப்பட்டிருக்கும்!

ஆடுகள் வேண்டாம், எருமைகள் வேண்டாம், கோழிகள்கூட வேண்டாம், ஒரு கோழிக் குஞ்சாவது அறுக்கப்பட்டிருக்கும்.

கடவுளுக்கு உண்டியல் வைப்பாரும் இல்லை. அதில் சில்லரைக் காசுகள்கூடப் போடுவாரும் இல்லை! 

கடவுளுக்கான துதிப்பாடல்களோ பஜனைகளோ நடப்பதும் இல்லை சுண்டல் வழங்கப்படுவதும் இல்லை!.

கடவுளின் பெயரால் கல்யாணம் நடப்பதோ புரோகிதம் செய்யப்படுவதோ தாலி கட்டப்படுவதோ நிச்சயம் இல்லை!

குழந்தை பிறந்தாலும் கிழவன் இறந்தாலும் கடவுளின் பெயரால் எந்தச் சடங்குகளும் செய்யப்படுவதில்லை! 

கடவுளை வேண்டி எந்தப் புண்ணிய யாத்திரையும் செய்யப்படுவது இல்லை!

எந்தப் பேயை விரட்டவும்  எந்தச் சாத்தானை விரட்டவும் கடவுளின் பெயரால் மந்திரங்கள் ஓதப்படுவது இல்லை! 

எந்தப் பிரசங்கிகளும் கடவுளைப் பற்றிப் பிரசங்கம் செய்வதில்லை!

சுருக்கமாகச் சொன்னால் யாருடைய மனதிலும் கடவுளின் உண்மையான பிம்பமே கிடையாது! 

கண்ட கண்ட பெயர்களைக் கடவுள்களாக வாயால் சொல்கிறார்களேதவிர அனைவருக்குமான ஆன்மிகம் எது என்று அறியக்கூட விரும்புபவர்கள் இல்லை! 

ஆனாலும் துணிச்சலாகக் கடவுளை நம்புவதாக எப்படிச் சொல்கிறார்கள்?.....

சொல்பவரும் கேட்பவரும் ஏமாளிகளாக இருந்தால் மட்டுமே இது சாத்தியம்!....

தத்துவம் ( 11 )

வாழ்வும் சாவும் ....   

உயர்ந்த பண்புகளுடன் உயர்ந்த வாழ்வு வாழும் ஒருவர் அவர் ஆணாயினும் பெண்ணாயினும் வாழ்வில் எவ்வளவு துன்பங்கள் எதிர்ப்பட்டாலும் அதைத் தாங்கிக்கொண்டு உயர்ந்த பண்புகளைக் கைவிடாது வாழ வேண்டும். 

அந்தத் துன்பத்திலும் சுகமிருக்கிறது. 

அதேசமயம் உயர்ந்த பண்புகளைக் கைவிட்டு தரங்குறைந்த வாழ்வுதான் வாழமுடியும் என்ற நிலைமை ஒருவருக்கு ஏற்பட்டால்  அந்த நிலையில் ஒருவர் வாழ்வதைவிடச் சாவதே மேல். 

அப்படி வாழ்வதைவிடச் சாவதில் சுகமிருக்கிறது. 

அதே சமயம் சாவுக்குமுன் கோழையைப்போல் வாழ்ந்து கோழையைப்போல் சாகாமல் தவறுக்கு எதிராக வீரமுடன் போராடி நிர்மூலமாக்கிவிட்டுச் சாகவேண்டும். 

அப்படிச் சாவதின்மூலம் தற்கொலையக்கூடப் பயனுள்ள தியாகச் செயலாக மாற்றலாம்!...

அதனால் சாவைச் சந்திப்பவர்க்குப் பூரண திருப்தியும் வாழ்ந்துகொண்டிருப்பவர்க்கு நன்மையும் ஏற்படும்.

எனது மொழி ( 133 )

மூட நம்பிக்கைகளின் ஊற்றுக்கண்... 

பழமையின் மேல் மதிப்பு வைத்திருக்கிற நல்ல அறிவாற்றல் உள்ளவர்கள் செய்யும் தவறு என்னவென்றால் முன்னோர்கள் எதைச் சொன்னாலும் அது சரியாகத்தான் இருக்கும் என்று ஆராயாமல் ஏற்றுக் கொள்வதே! 

அதன்காரணமாக முன்னோர்கள் பெயரால் அறிவுக்குப் பொருந்தாத விஷயங்களும் உண்மைகளாக மதிக்கப்பட நேர்கிறது!...

அறிவியலுக்கும் ஆன்மிகத்துக்குமான இடைவெளியும் அதிகமாகிறது!...

அதுவே மூட நம்பிக்கைகளின் ஊற்றுக்கண் ஆகிறது!....

உணவே மருந்து ( 57 )

தண்ணீர் நிறையக் குடிக்க வேண்டுமா?.... 

இப்போதெல்லாம் தினமும் நிறையத் தண்ணீர் குடிக்கவேண்டும் என்று நிறையப்பேர் வற்புறுத்துகிறார்கள் . 

அதற்கான காரணங்களையும் பல விதமாகச் சொல்கிறார்கள்...

அதிலும் அமெரிக்கர் அல்லது ஜப்பானியர் யாராவது சொன்னால் அது வேத வாக்காகவே ஆகிவிடுகிறது!...

நிறையத் தண்ணீர் குடிக்கவேண்டும் என்று வற்புறுத்தப்படுகிறதே தவிர யார் குடிக்கவேண்டும் யார் குடிக்கவேண்டியது இல்லை என்றெல்லாம் பிரித்துச் சொல்ல முக்கியத்துவம் கொடுக்கப் படுவதில்லை! 

எதனால் தண்ணீர் குடிக்க வேண்டும்?

தாகம் எடுத்தால்!

தாகம் எதனால் எடுக்கிறது?

நாம் உண்டது கரைக்கப்பட்டுச் செரிமானம் ஆகவும் நமது உடம்பில் வெப்பத்தாலும் வேறு காரணங்களாலும் வெளியேறும் நீரை ஈடு செய்வதற்காகவும்..

அப்படியானால் தாகம் இல்லாவிட்டால் தண்ணீர் குடிக்கவேண்டியது இல்லை அல்லவா?..

நிச்சயம் இல்லை! 

அப்படியானால் தாகம் இல்லாமல் ஏன் தண்ணீர் குடிக்கவேண்டும்?

தேவை இல்லை! 

குடிக்கச் சொல்கிறார்களே! 

அப்படியானால் சம்பந்தப்பட்டவர் ஒரு நோயாளியாக இருக்க வேண்டும்.

ஆம்! ஒருவருக்குத் தாகம் ஏற்ப்படாமேலே தண்ணீர் நிறையக் குடிக்கவேண்டும் என்றால் அதற்கு ஒரு காரணம் இருக்க வேண்டும்!

அந்தக் காரணத்துக்குப் பெயர்தான் நோய்! 

தண்ணீர் நிறைய அருந்துவது ஒரு மருத்துவமாக மட்டும் இருக்கவேண்டும் என்பதே என்னுடைய கருத்து!..

அதற்கான தேவை இருக்கவேண்டும். 

அப்படி அதிக அளவு தண்ணீர் குடித்துக் கரைத்து வெளியேற்றவேண்டிய அளவு உடலில் கழிவுகள் இருக்க வேண்டும்...

தண்ணீர் நிறையக் குடிப்பதன்மூலம் கழிவுகளைச் சுத்தப்படுத்தி நோய் குணப்படுத்தப்படுகிறது! 

ஆதாவது தண்ணீர் தேவைக்கு அதிகமாகக் குடிப்பதால் ஏற்படும் தீமையை விட அங்கு நன்மை அதிகமாக கிடைக்கிறது! 

அப்படி இல்லாமல் உடல் நலத்துடன் இருப்பவர்கள் தாகம் எடுக்காமல்  தேவைக்கும் அதிகமாக தண்ணீர் அருந்துவதால் நன்மை எதுவும் இல்லை!

மாறாகத் தேவையின்றிச் சிறுநீரகங்கள் உட்படப் பல பாகங்களுக்கும் வேலை கொடுக்கிறோம். அது உண்மையில் மறைமுகமாக நமக்கு நாமே தீங்கு விளைவித்துக்கொள்வதே ஆகும். 

ஆதாவது நோயில்லாமல் மருந்து உண்பதற்குச் சமம் ஆகும்.

ஆகையால நோயற்றவர்கள் தாகம் எடுக்குமளவு தாகம் எடுக்கும் நேரத்தில் மட்டும் தண்ணீர் குடித்தால் போதும் என்பதே சரியான முறை ஆகும்!

அரசியல் ( 47 )

ஒரு கேள்வி!

ஒரு மாநிலத்தில் சட்டமன்றத் தேர்தல் நடக்கிறது!

மக்கள் ஓட்டுப் போடுகிறார்கள்..

குறிப்பிட்ட ஒரு கட்சி மெஜாரிட்டி பெற்று ஆட்சிக்கு வருகிறது! 

முதல்வர் யார் என்று கேட்கப்படுகிறது!

இன்னின்னார் நிற்கிறோம், 

கட்சியின் மக்களால் தேர்ந்தெடுக்கப்பட்ட சட்டசபை உருப்பினர்கள் கூடித் தேர்ந்தெடுப்பார்கள், 

அல்லது ஏகமனதாக இன்னாரைத் தேர்ந்தெடுக்க இருக்கிறோம் 

இப்படி ஏதாவது ஒரு பதில்  சொல்லவேண்டும்.

அது நியாயம்! ஆனால் நடந்தது என்ன?

அதை டெல்லியில் உள்ள ஒருவர் முடிவு செய்வாராம்.

மற்ற மந்திரிகளையும் அவரே பட்டியல் பார்த்து முடிவு செய்ய வேண்டுமாம்!

நான் கேட்கிறேன்..... இவர்களுக்குத் தன்மானம் எப்போது வரும்?....

இவர்களையெல்லாம் தங்களை ஆளத் தேர்வு செய்யும் மக்களுக்கும் அதிலும் விஷயம் அறிந்தவர்களுக்கும் எப்போது சூடு சொரணை வரும்?.....

எனது மொழி ( 132 )

அவசர சிகிச்சை.....

பெரிய மருத்துவ மனைகளில் அவசர சிகிச்சைப் பிரிவு இருப்பது ஆபத்தான நிலையில் இருக்கும் நோயாளிகளைக் காப்பாற்றவா? 

அவர்களைக் காப்பாற்றவும் செய்யாமல் கொலையும் செய்யாமல் சிறுகச் சிறுகக் கொல்வதன்மூலம் இழுத்தடித்துப் பணம் கொள்ளை அடிக்கவா?...

அவசர சிகிச்சைப் பிரிவில் இருந்து உயிருடன் வெளி வருபவர்களை விட பிணமாய் வெளி வருபவர்கள்தானே அதிகம்?....

நான் இப்போது கடினமான நிலையில் இருப்பவர்களுக்குச் சொல்வதெல்லாம், 

விபத்தில் சிக்கியவர்களைத் தவிர மற்ற கடுமையாக நோய் முற்றிப் போனவர்களையும் வயதானவர்களையும் பொறுத்து .....

உயிருக்கு உத்திரவாதம் இருந்தால் அவசர சிகிச்சைப் பிரிவில் வையுங்கள். 

இல்லாவிட்டால் சாதாரண வார்டில் வைத்து வலி இல்லாமல் மட்டும் செய்யுங்கள். 

சாகும் முன் கண்களால் அனைவரும் பார்த்தாவது அழுது மனதை ஆற்றிக் கொள்கிறோம். 

நோயாளியும் தனிமையில் வதைப் பட்டுச் சாகாமல் அனைவர் முகத்தையும் பார்த்துக்கொண்டே சாகட்டும் 

என்று மருத்துவர்களிடம் சொல்லுங்கள் என்பதுதான். 

நோயாளியை மட்டும் அல்ல பயங்கரக் கொள்ளையின்மூலம் அவர்களின் குடும்பத்தையும் பொருளாதாரக் கொலை செய்கிறார்கள்!....

நான் சொல்வது தவறா?......

அரசாங்கம் இதற்கென ஒரு சிறந்த மருத்துவர் குழுவைக் கொண்ட பறக்கும் படையை அமைக்க வேண்டும்.

ஒவ்வொரு மருத்துவ மனையையும் அவசரசிகிச்சைப் பிரிவில் அனுமதிக்கப்பட்ட நோயாளிகளைப் பரிசோதித்து சரியான காரணத்தால்தான் அனுமதிக்கப்பட்டிருக்கிறார்களா?...உண்மை நிலவரம் நோயாளி குடும்பத்தாருக்குச் சொல்லப்பட்டிருக்கிறதா என்று சோதனை செய்யவேண்டும்.

தவறு இருந்தால் கடும் நடவடிக்கை எடுக்க வேண்டும்....

ஒரு நோயாளியைச் சேர்ந்தவர்களுக்கு சந்தேகம் வந்து தொலைபேசியில் சொன்னால் உடனே பறக்கும் படை அந்த மருத்துவ மனைக்குச் சென்று சோதனை செய்ய வேண்டும்.

தகவல் ரகசியமாக வைக்கப்படவேண்டும்....

புகார் செய்தால் அதற்கு நடவடிக்கை எடுத்தாகணும் என்கின்ற நிர்பந்தம் இருப்பதால் கொஞ்சமாவது மக்கள் பயன் அடைவார்கள் அல்லவா!...

என்ன செய்வது குற்றவாளிகள் ஆளும் நாட்டில் எப்படியெல்லாம் சிந்திக்கவேண்டியுள்ளது!....

தத்துவம் ( 10 )

காலப் பயணம்....

காலமும் தூரமும் ஒரு பாதையோ. ஒரு திசையோ அல்ல!

அல்லது ஒரு பொருளோ ஒரு உணர்வோ, ஒரு சக்தியோ எதுவும் அல்ல! 

சூழலைப் புரிந்துகொள்ள பயன்படுத்திக்கொள்ள  மனிதன் கருத்தளவில் வகுத்துக்கொண்டே ஏற்பாடே!....

இப்படி இருக்க காலப் பயணம் செய்து கடந்தகாலத்துக்கும் எதிர்காலத்துக்கும் பயணம் செய்யலாம் என்று நம்புவதும் அது சாத்தியம் என்று அறிவியல் விளக்கம் கொடுக்க முயல்வதும் என்ன நியாயம்?...

ஒவ்வொரு வினாடியும் கோடானு கோடிக் கணக்கான அணுக்கள் உள்ளே சேர்வதும் வெளியேறுவதுமான ஒரு குறிப்பிட்ட வடிவம்தான் மனிதன்.

குரிப்பிட்டகாலம் குறிப்பிட்ட வடிவிலும் இயங்கு முறையிலும் வாழ்ந்து விட்டு இயற்கையோடு கலந்துவிட மட்டுமே அவனால் முடியும் 

இந்த  நிலையில் வாழும் மனிதன் எந்த ஒரு பொருள் வடிவமும் இல்லாத கருத்து வடிவான காலத்தில் பயணம் செய்ய முடியும் என்பது அபத்தமாக மட்டுமே இருக்க முடியும் .

நிலையற்ற அணுச் சேர்க்கையும் பிரிவுமான உடலியல்வாழ்க்கையில் இதில் எந்த வினாடியில் இருக்கும் உடம்பைக்கொண்டு காலப்பயணம் செல்ல முடியும்?

காலப் ப் பயண  காலத்தில் மனித உடம்பின் பாத்திரம் என்ன?

காலப் பயண காலத்தில் மனித அறிவின் பாத்திரம் என்ன?...

அவனுடைய சக மனிதர்களுடனான தொடர்பும் உலகத்துடனான தொடர்பும் எப்படி?..

மூட நம்பிக்கைகளுக்கும் காலப்பயண நம்பிக்கைக்கும் வேறுபாடு என்ன?...

அதைவிட அறிவியலுக்கு அவமானம் வேறு எதுவும் இருக்க முடியாது!..

அதன் மூலம் அறிவியல் ரீதியாக வாழ்வைப் புரிந்து கொண்டு சரியாக வாழ்வதற்குப் பதிலாக அறிவுக் குழப்பம் ஏற்பட்டு மக்கள் மேலும் மேலும் மூடநம்பிக்கைப் படுகுழியில்தான் தள்ளப்படுவார்கள்!.....
------------------------------------------------------------------------------------

நண்பர்களுடன் உரையாடியபோது எனது கருத்துக்களாக வெளிப்பட்டவை:

ஒரு வேடிக்கையான உண்மை என்னவென்றால் எதிர்காலம் இறந்தகாலமாக மின்னல் வேகத்தில் மாறிக்கொண்டிருந்தாலும் எதிர்காலமும் இறந்தகாலமும் சமமே! இதில் நிகழ்காலத்துக்கு இடம் எங்கே?....

எதிர்காலத்தையும் இறந்தகாலத்தையும் நிகழ்காலம் என்ற இல்லாத ஒன்றால் பிரிக்கவே முடியாது. காரணம் எதிர்காலத்துக்கும் இறந்தகாலத்துக்கும் இடையில் இடைவெளி எதுவும் இல்லை!,,,,நிகழ்காலம் என்பது கால ஓட்டத்தின்மேல் நம்மால் எண்ணிப் பார்க்கப்படும் மனத்தால் நினைக்கப்படும் கற்பனைக் கோடுகளே! காலத்தின்மேல் இயக்கப்படும் Flying shuttle! ! அவ்வளவே!...

ஒவ்வொரு வினாடியில் கோடியில் ஒரு பங்குகூட எதிர்காலமாக இருந்து இறந்தகாலத்தில் பாய்கிறது. இதில் நிகழ்காலம் எங்கே?....


இப்போது வரை இருந்த இன்றையநாள் இறந்தகாலம். இதற்குமேல் வருவது எதிர்காலம். இதில் நிகழ்காலம் எங்கே?....

 ஒரு நொடியிலும் இறந்தகாலமும் வருங்காலமும் சேர்ந்துதான் உள்ளது.....

அது எவ்வளவு சிறியதாக இருந்தாலும் அதுவும் எதிர்காலம் இறந்தகாலத்தில் விழும் வீழ்ச்சியாகவும் இரண்டும் சேர்ந்து ஓடும் ஓட்டமுமாகத்தான் இருக்கமுடியும்...

இறந்தகாலமும் எதிர்காலமும் பிரிக்கமுடியாத ஒன்றாகச் சேர்ந்துள்ளது! அதற்கு நடுவில் நிகழ்காலம் என்பது எப்படி இருக்க முடியும்? எதிர்காலம் இறந்தகாலத்தில் விழும்போது அத்தோடு சேர்ந்து கொஞ்சதூரம் ஓடும் ஓட்டத்தைத்தான் நிகழ்காலம் என்று நினைத்துக்கொண்டு இருக்கிறோம்.....அது உண்மை அல்ல! மாயத் தோற்றம்....

இறந்தகால அனுபவங்களை படிப்பினைகளாகக் கொண்டு வருங்கால வாழ்வைத் திட்டமிட்டு வாழ்வதே நமது வாழ்க்கை நிகழும் காலம் சிறப்பாக இருக்கச் சரியான வழி ஆகும்!.

காலம் பெருவெள்ளமாகக் கடந்துபோவதாகவே உணர்கிறோம். அதை அடிப்படையாகக் கொண்டுதான் வாழ்கிறோம். அதை எதிர்காலம், இறந்த காலம், நிகழ்காலம் என்று மூன்று காலங்களாகச் சொல்கிறோம். ஆனால் எதிர் காலத்தையும் இறந்த காலத்தையும் வரம்பற்ற ஒன்றாகப் பார்க்கிறோம். உணர்கிறோம். ஆனால் நிகழ்காலம் என்று சொல்லிக் கால வெள்ளத்தில் ஒரு கற்பனையான புள்ளியை வைத்து அதனுடன் கொஞ்சதூரம் ஓடுகிறோம் . அவ்வளவே! அதை இதுதான் என்று சொல்ல முடியாது.....

எனது மொழி ( 131 )

அரசுகள் சாராயம் விற்க , சாராயம் விற்றவர்கள் கல்விச் சேவை செய்யும் ஒரு நாட்டில் எதுதான் சரியாக நடக்கும்?...

அவசரமான கடமை நாட்டில் உள்ள நல்லவர்களையும் தேச பக்தர்களையும் ஒன்றிணைத்து நாட்டைக் காப்பாற்ற வழி காண்பதே!...

சக்தியும் அறிவும் உள்ளவர் யாராவது முன்வரலாமே!....

எனது மொழி ( 130 )

நிலத்தடி நீர்வளம் 

நிலத்தடி நீர்வளம் மேம்பாடு அடைய விவசாய நிலம் பூராவும் ஐந்து சதவிகிதம் மழைக்குட்டைகளாக இருக்கவேண்டும் என்று சட்டம் இயற்றி அதைக் கறாராக அமலாக்கவேண்டும். 

மழைக் குட்டைகளை அரசே அமைத்துக்கொடுக்க வேண்டும்....

அப்படி இல்லாத நிலங்களின் உரிமை ரத்து செய்யப்படவேண்டும்....

இது அதிக செலவில்லாமல் ஒரு உத்தரவின் மூலம் அமலாகக்கூடியது. செய்வார்களா?....

யோகக் கலை ( 5 )

ஐம்பதிலும் வளையும்!...

ஐந்தில் வளையாதது ஐம்பதில் வளையுமா  என்பார்கள்...

ஆதாவது சிறு வயதில் ஏற்படாத நல்ல பழக்கங்களை முதிர்ந்த வயதில் ஏற்படுத்த முடியாது என்பது அதன் பொருள்.

அது உடல் உழைப்புக்கும் அது சார்ந்த பழக்கங்களுக்கும் பயிற்சிகளுக்கும் மற்றும் அனைத்துக்கும் பொருந்தும்.

ஆனால் இளம் வயதில் பல்வேறு காரணங்களால் தவறவிட்டவர்கள் முதிர்ச்சியடைந்த பின்னால் ஒன்றும் செய்ய முடியாது என்று நினைக்க வேண்டியது இல்லை!. 

காரணம் எந்த வயதில் எதை எப்படிச் செய்ய வேண்டுமோ அந்த வயதில் அதை அப்படிச் செய்ய வேண்டும்...

சிறுவயதில் நன்றாக விளையாண்டு, பயிற்சிகள் செய்து, உடலை விருப்பம்போல் வளைத்து எல்லாவித இயக்கங்களுக்கும் தகுதி உடையதாய்ப் பேணுதல் உயர்ந்ததே! 

ஆனால் அப்படி இல்லாமல் குறிப்பிட்ட வயதைத் தாண்டியவர்கள் தாங்களும் நல்லபடி விளையாடவேண்டும் பயிற்சி செய்ய வேண்டும் என்று விரும்பினால் கவலைப்படவேண்டியது இல்லை! 

பொதுவாக வாழ்க்கைக்கு எந்த விதமான அசைவுகள் எல்லாம் தேவையோ அந்த அசைவுகளுக்கு ஏற்றதாக ஒவ்வொருவர் உடம்பும் பக்குவப்பட்டு விடுகிறது! 

அதிகமான சிக்கலான அசைவுகள் தேவைப்படாத வசதி வாய்ப்பு உள்ளவர்கள் அல்லது நேரம் கிடைக்காதவர்கள் குறிப்பிட்ட சில வகையான அங்க அசைவுகளுக்கு மேல் இயங்காமல் இருப்பதால் அவர்களின் உடல் உறுப்புக்கள் அதற்கேற்ற முறையில் செயல்பட மட்டுமே தகுதி உடையவை ஆகிவிடுகின்றன. 

அனைத்து உடம்புக்கும் பொதுவாக இயங்கும் இதயம், நுரையீரல் போன்ற உறுப்புக்களும் தேவைக்கேற்ற அளவு மட்டும் செயல்படும் இயல்பை அடைந்து விடுகின்றன. 

அதன்காரணமாக ஏதாவது ஒரு நாள் அவசரத் தேவைக்காக சில அடிகள் வேகமாக நடந்தாலும், ஓடினாலும், சில படிகள் ஏறினாலும் கூட உடல் ஒத்துழைக்க மறுக்கிறது, வலிக்கிறது, மேல்மூச்சு கீழ்மூச்சு வாங்குகிறது, சுழுக்கு ஏற்படுகிறது,  இன்னும் இதயம் வேகமாகது துடிக்கவும் செய்கிறது.... 

குறிப்பிட்ட காலத்துக்குப் பின்னால் அறிவில் தெளிவு ஏற்ப்பட்டு உடல் கட்டுமானத்தை அதிகப்படுத்த வேண்டும் என்று உணரும்போது உடம்பு ஒத்துழைக்க மறுக்கிறது! அது பழக்கத்தினால் நேரும் விளைவு. 

ஆனால் அதற்காக மனம் ஒடிந்து போக வேண்டியது இல்லை! 

காரணம் அந்த நிலையிலும் உடம்பைச் சிறப்பானதாக மாற்றி அமைக்க முடியும் .

ஆதாவது பயிற்சி என்பதை இரண்டு விதிகளாக வரையறுக்கலாம்...

 முதலாவது ஏற்கனவே இருக்கும் நிலையில் இருந்து அனைத்து விதத்திலும்  கூடுதலான எல்லைகளை உடம்பின் இயக்கங்கள் அடையவேண்டும் என்பதை  நோக்கமாகக் கொண்டு பயிற்சி செய்வது! உடம்பின் கட்டுக்கோப்பை மேம்படுத்திக்கொண்டே இருப்பது. 

 இரண்டாவது விதி தாங்கள் நினைத்த எல்லையைத் தொட்டபின்னால் அந்த நிலை பலவீனமடையாமல் தொடர்ந்து பயிற்சியின்மூலம் ஈடு செய்துகொண்டிருப்பது! 

இதில் முதல் விதியின்கீழ் அனைத்து வயதுள்ள அனைத்து மக்களும் பயிற்சி செய்து பயன் பெறலாம்.....

தங்களின் உடல் எந்த அளவு வளைகிறதோ அதைவிட கொஞ்சம் கூடுதலாக வளைப்பது, தங்களின் உடல் எவ்வளவு சுமக்குமோ அதைவிடக் கொஞ்சம் கூடுதலாகச் சுமப்பது, தங்களால் எவ்வளவு தூரம் நடக்க முடியுமோ அதைவிடக் கூடுதலான தூரம் நடப்பது, தங்களால் எவ்வளவு வேகமாக நடக்க முடியுமோ அல்லது ஓட முடியுமோ அதைவிடக் கொஞ்சம் அதிகமான வேகத்தில் நடப்பது அல்லது ஓடுவது, என்பதைப் பயிற்சி முறைகளாகக் கொள்ள வேண்டும். 

அதன்காரணமாக உடம்பு தேர்ச்சிபெற்ற பயிற்சியாளர்களைப்போல அதிகம் வளையாவிட்டாலும், அவர்களைப்போல வித்தைகள் செய்ய முடியாவிட்டாலும், அவர்களுக்குப் பயிற்சியால் கிடைக்கும் அத்தனை நன்மைகளும் கிடைக்கும். காரணம் பயிற்சியின் காரணமாகத் தேவை இல்லாத குப்பைகள் உடம்பில் இருந்து வெளியேறுகின்றன. இதயம், நுரையீரல் மற்ற செரிமான உறுப்புகள், சுரப்பிகள் அனைத்தும் தங்களின் வலிமையையும் திறனையும் வளர்த்துக்கொள்கின்றன. 

அதனால் விளைவில் ஐந்தில் வளைப்பவர்களும் ஐம்பதில் வளைப்பவர்களும் ஒன்றாகிறார்கள்.கிடைக்கும் பயனும் இருவருக்கும் ஒரே மாதிரித்தான் நன்மை அளிக்கிறது!...

வளையும் எல்லைகளைப் பற்றிய கவலை சர்க்கஸ் காரர்களுக்கும் தொழில்முறைப் பயிற்சியாளர்களுக்கும் விளையாட்டு வீரர்களுக்கும் மட்டும்தான் தேவை !

நல்லமுறையில் உடல்நலத்தைப் பேண விரும்பும் சராசரி மக்களுக்கு அந்தக் கவலை அவசியம் இல்லை! 

ஐம்பதிலும் தேவையான அளவு வளையும்!....

அனைத்து நன்மைகளும் கிடைக்கும்!....

சிறுகதைகள் ( 16 )

இளைஞனும் கிழவனும்! 

(எப்போதோ கேட்ட கதை என் சொந்தக் குரலில் சொல்லியிருக்கிறேன்...)

ஒரு பத்திரிகையாளருக்கு இரண்டுவிதமான தகவல் திரட்டவேண்டிய வேலை!

முதலாவது கண்டதைத் தின்று குடியும் புகைப்பழக்கமுமாக இருந்து கெட்டுப்போனவரைச் சந்தித்துப் பேட்டி எடுக்கவேண்டும். 

இரண்டாவது இயற்கை உணவை உண்டு இயற்கைச் சூழலில் வாழ்ந்து ஆரோக்கியமாக வாழும் ஒருவரைப் பேட்டி காண வேண்டும்.

முதலில் கண்டதைத் தின்றுகொண்டு குடிக்கும் புகைக்கும் அடிமையான இளைஞன் ஒருவனைச் சந்திக்க அவனுடைய வீட்டிற்குச் சென்றார்.

அவன் வீட்டு வாசலில் ஒரு தாத்தா லொக்கு லோக்கென்று இருமிக்கொண்டு உட்கார்ந்திருந்தார்.

அவரிடம் பொய், "தாத்தா! இங்கே முப்பது வயசுக்காரர் இருக்கிறதாக் கேள்விப் பட்டேன். அவரைப் பார்க்கணும். எப்போ வருவார் " என்று கேட்டார்.

அதற்கு அந்தத் தாத்தா, " அட நாந்தானப்பா அந்த ஆளு என்ன வேணும்?" அப்படின்னு கேட்க இவருக்குத் தூக்கி வாரிப் போட்டுதாம். 

அவரோட கதையைக் கேட்டுட்டு அதன்பின்னாலே இயற்கை உணவும் நல்ல பழக்கங்களுமா ஒரு மலை அடிவாரத்துல வாழ்ந்துகிட்டிருந்த ஒரு தாத்தாவைப் பார்க்கப் போனாராம்.

பத்திரிக்கையாளர் தேடிப் பிடிச்சுப் போனபோது ஆள் இல்லை! 

கொஞ்ச நேரம் காத்திருந்த பின்னாலே ஒரு வயசான தாத்தா காட்டுக்குள்ள இருந்து ஒரு சுமையைத் தூக்கிகிட்டு வந்தாராம். 

சுமையை இறக்கிப்போட்டுவிட்டு கட்டிலில் உட்காரவும் பத்திரிக்கையாளர் அதிர்ந்துபோய் விட்டாராம். 

இந்த வயசுலே இப்படி ஒரு மனிதரா என்று நம்பமுடியவில்லை!.....

அப்புறம் தான் வந்த விபரத்தைச் சொல்லிவிட்டு அவருடைய இளமையின் ரகசியம் என்ன என்று கேட்டாராம்.

அதற்கு அந்தத் தாத்தா,"தம்பி! இதுக்கு நான் பதில் சொல்லுறத விட மலைமேலபோன எங்க அப்பா இப்போ விறகு கொண்டு வந்துடுவாரு! அவரைக் கேட்டா நல்லாச் சொல்லுவாரு! " அப்படின்னு சொல்லவும் பத்திரிகையாளருக்கு மயக்கமே வந்துடுச்சாம்!....

உணவே மருந்து ( 56 )

பழைய சோறு
============

வெய்யில் காலம் துவங்கிவிட்டது. இனி ஆளுக்கு ஆள் பேச்சுத் துவங்குவதே வெய்pலைப்பற்றித்தான் இருக்கும்.

மின்சாரமும் பழிவாங்குவதால் இந்தக் கோடை ஒரு சோதனையான காலமாகத்தான் இருக்கப்போகிறது.

இந்த நேரத்தில் வழக்கொழிந்து வருகிற பழையசோற்றின் சிறப்புப் பற்றிச் சொல்லப் போகிறேன்.

அரிசி, கம்பு, சோளம், தினை, சாமை, ராகி போன்ற தானியங்களால் சமைக்கப்படும் சோற்றைக் கொண்டோ களியைக் கொண்டோ பழைய சோறு தயாரிக்கலாம்.

குறிப்பாக அரிசியும் கம்பும் சோளமும் எளிதில் கிடைக்கக்கூடியவை.

பழைய சோறு என்பது அதற்காகப் பிரத்தியேகமாகத் தயாரிக்கபடுவது அல்ல. சூடாக உண்பதற்காகத் தயாரிக்கப்படும் சாதம் அல்லது களியை உண்டுவிட்டு மீதம் இருப்பது ஆறியபின்பு அதில் சுத்தமான தண்ணீரை ஊற்றி வைத்துவிட்டால் சுமார் ஆறுமணிநேரத்துக்குப் பின்னால் பழைய சோறு தயார். அதை மேலும் ஒரு நாள் வரை வைத்திருந்து போதுமான அளவு சோறும் அதிலுள்ள நீரும் சிறிது உப்பும் சேர்த்து பழைய சோற்றுக்கலவையை உண்பதற்குத் தயார் செய்துவிடலாம்.

பொதுவாகப் பழைய சோற்றைக் கையால் பிசைந்து கரைத்தால்தான் நன்கு கூழ்பாகத்தில் உண்பதற்கு நன்கு இருக்கும். கரண்டியால் கலக்கினால் ஒன்றுக்கொன்று ஒட்டாமல் பருக்கை பருக்கையாக இருக்கும். 

சமைப்பது மண் சட்டியாக இல்லாமல் வேறு பாத்திரமாக இருந்தாலும் அதைப் பழைய சோற்றுக்காக எடுத்துவைக்கும்போது மண் சட்டியில் வைத்துத் தண்ணீர் ஊற்றிவைப்பதுதான் சிறந்தது. காரணம் அது கூடுதல் சுவையாகவும் குளிர்ச்சியாகவும் இருக்கும். மண் சட்டி இல்லாவிட்டால் மற்ற பாத்திரங்களிலும் வைக்கலாம்.

பழைய சோற்றில் மோரோ தயிரோ கலந்துகொள்வது மேலும் சுவையை அதிகப்படுத்தும். அதனுடன் சின்னவெங்காயத்தை சின்னதாக நறுக்கிப் போட்டோ அல்லது நேரடியாய்க் கடித்துக்கொண்டோ பழைய சோறு சாப்பட்டால் இன்னும் சுவை கூடுதல் ஆகும். முன்பெல்லாம் பச்சைமிளகாயைக் கடித்துக் கொண்டும் பழைய சோறு உண்பார்கள்.

பழைய சோறு தண்ணீர் ஊற்றிவைத்த ஆறில் இருந்து பன்னிரண்டு மணிநேரத்துக்குப் பின்னால் அதை முறைப்படி உப்பும் இருந்தால் மோரோ தயிரோ கலந்து கலக்கிக் குளிர் சாதனப் பெட்டியில் வைத்துப் போதுமான நேரத்துக்குப்பின்னால் சாப்பிட்டால் அதன்சுவையை வர்ணிக்கவே முடியாது.

இது அந்தக்காலத்தில் ஏழை மக்களின் மலிவான உணவாகும். 

சமைத்த உணவைவிட இது கூடுதல் சத்துக்களைக் கொண்டது. எளிதில் செரிக்கக்கூடியது. இயற்கை உணவுக்கு நிகரானது. 

அந்தக் காலத்தில் கடுமையாக உழைக்கும் ஏழைகளும் உழைப்பாளிகளும் விவசாயிகளும் பழைய சோறுதான் சாப்பிட்டு வாழ்ந்தார்கள் என்றால் அதன் சிறப்பை நன்கு உணரலாம்!

அந்தக் காலத்தில் காலை உணவு உண்ணும் நேரத்தைப் பழைய சோத்து நேரம் என்றுதான் கிராமங்களில் சொல்வார்கள்.

பழைய சோற்று வகைகளிலேயே கம்புதான் மிகுந்த மணத்துடனும் சுவையுடனும் முதலிடம் வகிக்கிறது. அதனால்தான் கம்மங்கூழ் பானைகளில் வைத்து தெருவோரங்களில் கூட விற்றபனை செய்யப்படுகிறது.

பழைய சோற்றில் உள்ள சிறப்புகளைத் தனிக் கட்டுரையில் விளக்குவதுதூன் சிறப்பாக இருக்கும். அது ஒருவகையில் மருத்துவகுணமும் இயற்கைத் தன்மையும் கொண்டதாக இருப்பதால் சமைக்கப்படும் எந்த ஒரு உயர்ந்த வகை உணவை விடவும் ஒப்பு நோக்கில் உடல் நலனுக்கு ஏற்றதும் மிகவும் செலவு குறைந்ததும் ஆகும்.

மற்ற உணவை உண்டால் தாகம் எடுக்கும். ஆனால் பழைய சோறு உண்டால் தாகத்தைப் போக்கும்.

பழைய சோற்றை மறக்கவேண்டாமே!

http://www.facebook.com/photo.php?fbid=313881932012826&set=o.139649789477115&type=1&theater

அரசியல் ( 46 )

கொஞ்சம் சிந்திப்போமே!...

நமது நாட்டில் லஞ்சம் வாங்குபவன் எவனாவது .......

தன்னுடைய சாதிக்காரனிடம் வாங்காமல் விட்டிருக்கிறானா?

தன்னுடைய மதத்துக்காரனிடம் வாங்காமல் விட்டிருக்கிறானா?..

தன்னுடைய ஊர்க்காரனிடம் வாங்காமல் விட்டிருக்கிறானா?

தனது மொழி பேசுபவனிடம் வாங்காமல் விட்டிருக்கிறானா?

தன்னுடைய கட்சிக்காரனிடம் வாங்காமல் விட்டிருக்கிறானா?

கடவுளுக்குப் பயந்து வாங்காமல் இருந்திருக்கிறானா?

சட்டத்துக்குப் பயந்து வாங்காமல் இருந்திருக்கிறானா?...

அப்படியெல்லாம் இல்லையென்றால் இந்தப் பெயர்களை உயர்ந்ததாக நினைப்பது வெட்கக்கேடானது இல்லையா?....

ஏன் இதை நினைத்து நமது மக்களுக்குச் சூடு சுரணை வர மறுக்கிறது?...

அப்படிப்பட்ட உணர்வு எப்போது வருமோ அப்போதுதான் நாடு உருப்படும்!

அதுவரை தேசபக்தி என்பதுகூட அர்த்தமற்ற வார்த்தையே!....

அரசியல் ( 45 )

Subash Krishnasamy
March 16 at 12:33pm ·
ஆக்கிரமிப்பாளர்களை மாவீரர்கள் என்று சொல்லித் தருவது நமது வரலாற்றுப் பாடங்கள் செய்யும் தவறு!

அலெக்சாண்டர் ஒரு ஆக்கிரமிப்பாளன் என்பதற்கு மேல் என்ன உயர்ந்த நோக்கத்துக்காகப் போர்களை நடத்தினான்?

அவனுக்குப் பெயர் மாவீரன் என்றால் மக்களுக்காகத் தியாகம் செய்த மாவீரர்களை என்ன சொல்லி அழைப்பது?

யோசிக்கவேண்டும்!

ஏன் வரலாற்று ஆசிரியர்கள் இது பற்றிச் சிந்திப்பது இல்லை?

இது மக்கள் மத்தியிலும் வரலாற்றுப் பாடம் படிக்கும் மாணவர்கள் மத்தியிலும் எத்தகைய உணர்வுகளை ஏற்படுத்தும்?

அதுபோன்ற தவறுகளைச் செய்கின்ற புத்தி நமக்கும் இருக்கிறது என்பதே அதன் பொருள்!

நமது மக்களுக்கு ஆக்கிரமிப்பை நியாயம் என்று கற்பித்தால் அடுத்தவர்கள் செய்யும் ஆக்கிரமிப்புப் போர்களைத் தவறென்று சொல்லும் தகுதி இல்லாதவர்கள் ஆவோம்!...

http://www.facebook.com/voiceofsubash/posts/494655433935474?notif_t=like

எனது மொழி ( 129 )

நல்ல அரசியல்!

அரசியல்வாதிகள் கெட்டவர்கள் என்று பொதுவாகச் சொன்னால் எந்த ஒரு தேசபக்த இயக்கமும் கெட்டதாகிவிடும். 

அதுமட்டுமல்ல அவப் பெயருக்குப் பயந்து நல்லவர்கள் அரசியலில் இறங்க முன்வர மாட்டார்கள். 

கெட்டவர்கள் மட்டுமே அரங்கில் இருப்பார்கள்...

அதுதான் இப்போது நடக்கிறது!...

ஆகையால் அரசியலை அயோக்கியர்களிடம் இருந்து காப்பாற்றவேண்டும் என்பதே சரியானது!.....